1 Apolüh Korin mlüh-a ah ve k'um üng Polüh kkhaan lam üng Kalatih hne da ngleng lü Ephet mlüh-a phavaai kti. Asua akläke akhäk ah jah hmuh. 2 Polüh noh “Nah nih jum ei lo üng Mkhyangsiim nah nih yah ei ktie mä” tilü ah jah kthäh. “Mkhyangsiim ave am ave phi am ngja-khoi u ngü” tilü ah nih mshak be u. 3 “Asun kba ani ta i a patiso nah nih khaam ei ktie ni” tilü ah jah kthäh be. “Patiso Johaana ah jah peet patiso ni kah nih khaam ei u” tilü ah nih pyen be u. 4 Polüh noh “Patiso Johaana patiso ta, mkhye naaka kkhyüh vuuk be kti kkhyaangea phäh ni. Johaan noh Isare-e üng ‘Keia hnua lok kti nah nih jum ei vai u’ tilü ah jah mtheh. Asun ni Jeishüh ta” tilü Polüh noh ah pyen. 5 Asun ngja-ulüta Booi Jeishüh-a ngming üng patiso khaam ei ktie. 6 Polüh noh ah nih kkhaana ah kut mtaang lüta Mkhyangsiim ah nih k'uma vaang lok kti. Mkhyangsiima jah pyen kshaka kba aksea läk phi pyen lü shahma pyen lok ktie. 7 Asue sun ah nih bänga xalei nghngih lok ktie ni. 8 Polüh ta Sangsiim ngthei naak kyonga lut lü käh kyüh kyook ei lü jah ngsi ngjaang püi kti. Khya kthum jah ngthäh ngkhyah püi lü Pangsiima pea mong jah msuuk mtheh hlo hleep kti. 9 Akhäk noh ta nghnga ngsang lü am jum ei hlü u. Asun üng Jeishüh-a msuh mtheh naak mong am adoa be sun ngkhääm lok ktiea veeia ah nih pyen u. Polüh noh ta jah shot ta-lü akläke ah jah seh püi. Kona Tüh Ranuh-a kyong ima amhnüüp tä lü Pangsiima kkhyü jah ngthäh ngkhyah püi kti. 10 Asun kba kum nghngih poh lü Asha hnea vek kti Jüdah-e jah kkhyaang mjü kse-e abäng noh Booi Pa-a kkhyü ngjak ktie ni.

11 Pangsiim noh Polüh-a kut üng am hmuh ngjaak khoia mün sam kshe ah poh shak. 12 Polüh-a mti sha hne kti jih sa, ah shui shak bi loh sun la-vaai lü mneh mah-a veei ah nih seh püi üng mneh mah mya be kti ni. Kho yaaie phi shot ktie. 13 Jüdah akhäk noh ngvaak hü ulü kho yaai mshot khoi ktie. Asue noh Booi Jeishüh-a ngming üng kho yaai mshot vaia mhnüt hü ktie. Ah nih-e noh kho yaai sun üng “Polüh noh ah kpyaü hü Jeishüh-a ngming üng shot ua” tilü ah nih jah mtheh. 14 Shekhe Vah ngming nak kti Jüdah khotu ngsiim kdäma sa kpa kkhyüh asun kba thoon hü ktie. 15 Kho yaai noh ta “Jeishüh phi kah kshing ni. Polüh phi kah kshing ni. Nang nih-e ta nang nih ue ni” tilü ah jah kthäh. 16 Kho yaaia vaan naak sun noh ngtoop lü jah kyaak shih lü jah nääng lüta shuum ktie. Ah nih nih-e sun shui kpum shak kkoa leem shou lü im k'uma kkhyüh sen ktie ni. 17 Ephet mlüh-a vek kti Jüdah-e jah Kärih-e abäng noh asuna mong ah nih ngjaak u. Ah nih nih-e sun kyüh ei lo-ulü Booi Jeishüh-a jou taai naak sha lü däm däm lok kti ni. 18 Jum ei lok kthaai ktie üng ka kho hah lo-ulü ah nih bäü hma mkhye mshoh naak khoi sun kkhyaang pä ma-a phyeh phyang lok ktie. 19 Ngjou hma ktie noh phi ah nih shum mang ei khoi sa up jah lo püi lü kkhyaang pä ma-a mei üng ah nih jah mkhih u. Ah nih sa up phu kkhe ulü ta ah ngui sha-a thoong mhma kip bang lok kti. 20 Asun kba su Booi Pa-a kkhyü sun ahiit üng sha lü pung pyah lobok bok kti.

21 Kona Polüh sun Make Tonih jah Kärih hne üng sit lü Jeirüh Shalem mlüh da seh vaia ah suum saak. “Jeirüh Shalema vema ngüshe Romah phi kah phak kkhai ni” tilü ah pyen. 22 Polüh noh ah nih kpüi kpak kti xooi Timotih jah Eratuh sun Make Tonih da jah natüüi lü ah pät ta Asha hnea noong vei vehüt kti. 23 Asun k'um üng Ephet mlüh-a Booi Pa-a mong ah nih jah msuh mtheh phäh üng sok sek beleh velok kti. 24 Teme Tirüh ngming nak kti noh ngui sha üng Athemih-a ah nih shui u mhnam nua hjok khah im sa-a lup msom kti. Ah khuut poh ktie noh ktha kheen kho hah yah ei lü ah nih ong jah phyong shak kti. 25 Teme Tirüh noh ah khuut poh ktie jah ah poh-a ng'yüi khuut poh hnga ktie jah mkhääm lü “Kkhyaangeo, aana khuut nih poh-a phäh nih nih-ea ong lam do kti ati sun nah nih kshing ktie am ni bä. 26 Tuh-a ta ahina kkhyaanga ngkho Polüh-a poh pyen sun nah nih hmu-ngjak ktie am ni kkhe bä. Ah nih noh ‘Kkhyaanga kut üng poh pyaan mhnama lup üng ahiit thäü thäü am ve laang’ tilü pyen hü kti. Ephet mlüh jah Asha hne naküta aana Polüh noh kkhyaang kho hah ah nih da ngpüi lok kkhaia jah hlo hleep hü kti ni. 27 Asuna thoon lü nih nih-ea ong lam thang mseh kkhai ni. Asun däk am ni ham. Asha hne jah kho mdek luuma ah nih hjok khah u nih mhnam nua hjok khah ima hlüng taai naak phi pyak lü kkhyaange noh ah nih-a däm duh naak phi am lei shong ti kkhaie ni” tilü ah pyen. 28 Kkhyaang pä noh ah ngsi ngjaang sun ngja-ulüta thüi ei kkhüt ulü “Ephetea Athemih hin hlüng taai däm duh kti ni” tilü ngpyaang ktie. 29 Mlüh k'um abäng üng kkhyaange sun üng-phou lü ngpyaang lo hü pyei ktie. Kkhyaang päe sun noh Polüh-a hlonga sit hü kti xooi, Make Tonih hnea ka Kajüh jah Arih Taküh sun jah kaih lü ngkhääm naak luuma ah nih jah don püi. 30 Polüh ta kkhyaang päea ma-a vaang lü kkhyü pyen hlü kyo kti. Akläke noh ta ah nih ngya u. 31 Asha hne aso-yah booie akhäk sun Polüh-a looi püie ni. Asue noh Polüh-a veeia kkhyaang tüüi lü “Ah nih ngkhääm naaka luuma käh sit bing bing bä” tilü ah nih nghui naak u. 32 Ngkhääm ktie sun üng-phou pyei lü ahnga hnga pyen lü ngpyaang ktie. Aknung bok noh ta i a phäh ngkhääm lok ktie atia phi am kshing ngtu u. 33 Jüdah-e noh Alek Santa sun kkhyaang päa ma-a ah nih tüih u. Alek Santa noh ta kkhyaang pä ah kut üng jah him ma lü ng'yung ei naak pyen kkhaia ngpyaih xat kti. 34 Lüphi Alek Santa sun Jüdah mjü atia kshing lo-ulüta “Ephetea Athemih hin hlüng taai kti ni” tilü kkhyaang päe sun buh nghmin nghngih bang akthai mata ngpyaang pyei ktie. 35 Akpäih naaka mlüh sa yuk kdäm noh kkhyaange sun jah ngim shak ma lü “Epheteo, Ephet mlüh-a ka abäng noh däm duh ktia Athemih hjok khah im phi, kkhaan khoa kkhyüh kyalok kti ngsiim ngsaih kti mhnama lup phi akshe hleena lei shong hjok khah ktie ati sun kho mdek luuma kkhyaange noh kshing ktie ni. 36 Ahie hin u noh phi am jah hai bak khoh. Lüphi ngim be hnüh-ua, angngaih kka-a i phi käh poh ua. 37 Aana kkhyaange noh hjok khah ima ka mpyu ei ktie phi am ni. Athemih mhnam nu thang msheet ei lü yaih yün ktie phi am nik kti ahia nah nih jah kaih lo u ni. 38 Teme Tirüh jah ah khuut poh ktie noh ah nih kbäü ei vaia ngkho ave ta si jaang luum vek kti ni. Aso-yah booie phi vek ktie ni. Asua jah kbäü ei lü jah si jaang kkhaie shü. 39 Asun kba am ani üng phi akse-ea be nah nih pyen hlü u ta mlüh khong mange jah khü lü mlüh paea ngkhääm naaka si jaang vai ni. 40-41 Tuh ngooi nah nih üng-phoua phäh üng Romah aso-yah noh jah kbäü ei khoh kkhaie ni. Kona tuh ngooia suuk kyaak naak i phi am ve xa ktia nih thoon u hin am nih msiim khoh u” tilü ngkhääm ktie sun ah jah ngpyeen be shak.