1 Kona Polüh Athen mlüh-a kkhyüh Korin mlüh-a sit kti. 2 Asua Aküüi Lah-a ngshui kti Jüdah kkhyaang ah hmuh. Aküüi Lah sun Pon Tüh khyonga hmi kti. Ah kkhyu Phyiki Lah-a dä Italih pea kkhyüh Korin mlüh-a ah nih pyong lo i vei am lo ham. I lüni ti ta Klaau Tiuh-a ah nih shui Kesha shang phuhlang noh Jüdah-e abäng naküt Romah mlüh-a kkhyüh jah mshot lü pyong lok kti xooi ni. 3 Polüh ah nih veeia soon ei vaai kti. Polüh sun asu xooi üng ah nih khuut täng lüta ah nih hlonga velü khuut poh kti. Ah nih khuut ta jih shung müüp tak lü khyüi ni. Asun poh lü ei shui ktie ni. 4 Polüh noh Sangsiim ngthei naak kyonga Pangsiim ngam püi mhnüüp tä jah ngthäh ngkhyah püi lü Jüdah kkhyaange jah Kärih kkhyaange ah nih jum ei lo vaia jah hlo phok kti. 5 Shilah jah Timotih sun Make Tonih hnea kkhyüh phalo nih lüta Polüh noh Pangsiima kkhyü ngshääi ei ktia kpyaü hü kti. Jeishüh hin Khrito ni ati sun Jüdah-ea veei mtun ei kshi lü shak shi kti. 6 Jüdah-e noh hai bak lü ah nih thang msheet u. Asun üng ta ah jih kphot hüt lü “Nang nih-e hin nah nih sim pyak u ta nah nih pät üng shüt she. Kei ta kah ngsiim kti ni. Tuh-a kkhyüh kkhyaang mjü kse-ea veei kah sit kkhai ni.” 7 Asun üng ah nih nih-e jah ta-hüt lü Pangsiim hjok khah kti Titüh Jutüh-a ah nih shui kkhyaang mjü ksea ima vevaai kti. Titüh-a im ta Sangsiim ngthei naak kyonga hlonga vek kti. 8 Sangsiim ngthei naak kyong up kti Khyü Pu noh ah kkyoong mah mah Booi Pa jum ei lok ktie. Korin mlüh-a vek kti kkhyaang kho hah pa noh phi thang kdo kkya sun ngja-ulü jum ei lü patiso khaam ei lok ktie. 9 Mthan mat üng ta Polüh noh mhnüh mdan ah hmuh. Booi Pa noh “Käh kyüh eia. Thang kdo kkya nah kpyaü käh khäk shaka. 10 Kei hin nah hlonga kah vek kti ni. U noh phi nang hin am ning mhleem mshou khoh. Aana mlüh k'uma kah kkhyaange kho hah pa vek ktie ni” tilü ah pyen sun Polüh noh ah ngjaak. 11 Polüh noh ta kum mat jah kum phe velü kkhyaange üng Pangsiima kkhyü jah msuuk mtheh kti. 12 Kärih hnea Kalioh-a ah nih shui u sun Romah aso-yah booi kdäma ah thoon lo üng Jüdah-e noh ngi ulü Polüh ah nih man u. Kona kong si luuma ah nih seh püi u. 13 “Aana kkhyaang hin noh thuum lüüm kkaan lü Pangsiim ah nih hjok khah vaia jah hlo hleep kti ni” ah nih ti u. 14 Polüh noh ngsi ngjaang kkhaia ah ngpyaih xat üng Kalioh noh ta “Jüdah-eo, ahina kkhyaang noh thuum kpet mjak kti, mpyuk ei ktia ah thoon ta ning jah suun ei lü nah nih pyen kah ngngaai kkhai shü. 15 Asun kba am nik ktia kkhyü be ni. Ngming khüa mong ni. Nang nih Jüdah-ea thuum seena mong ni, nah nih ngsuh ta nah nih pät noh si jaang ua. Kei noh ta asun bang thäü thäü am si jaang ngü” tilü ah pyen. 16 Kona kong si luuma kkhyüh ah jah mshot. 17 Kärih-e noh Sangsiim ngthei naak kyong up kti Sho Theneh man lü kong si luum ma-a ah nih te u. Kalioh noh ta am jah suh lih ei laang kuung.

18 Polüh ta Korin mlüh-a be nae mah mah kho vei vema kti. Kona Phyiki Lah jah Aküüi Lah jah seh püi lü mhlüüi kdäm üng Shürih hne da sit ktie. Polüh noh mhlüüi kdäm üng am ah nih seh ham üng Pangsiim üng kkhyü taam lü Khen Kye mlüh-a akkanga ah lu kteih hüt kti. 19 Ephet mlüh-a lai ulüta Polüh noh Phyiki Lah jah Aküüi Lah ah jah taak hüt. Jüdah-ea Sangsiim ngthei naak kyonga lut lü jah ngthäh ngkhyah püi kti. 20 Jüdah-e noh Polüh ah nih veeia kho vei ah ve vaia ah nih nghui naak kyo. Polüh noh “Am thoon khoh” tilü ah pyen. 21 Lüphi ah nih ngkya hnüh vai üng Polüh noh “Pangsiim noh ah mkhüh naak ta nah nih veeia kah lobe tü kkhai ni” tihüt lü mhlüüi kdäm üng Ephet mlüh-a kkhyüh sit kti. 22 Kesha Reh mlüh-a ah pha vaai kona Jeirüh Shalema sit lü shaang ngsiim jah üm hlaam hüt lü Anti Ook mlüh-a lai lok kti. 23 Anti Ook mlüh-a akhäk vei bang vema lü Kalatih hne jah Phyüki hnea sit hü kti. Akläke ah nih jum eia ngkhääng naak vai jah msuuk mtheh kti.

24 Alek Santa mlüh-a hmi kti Jüdah kkhyaang mat Apolüh ngming nak kti sun Ephet mlüh-a lai lok kti. Ah nih sun ah hmüüi mpyong theem lü Sangsiim phi kshing pi pi kti ni. 25 Ah nih noh Booi Pa-a mong lam kshing kti. Yü sou pyei lü sang ktia Booi Jeishüh-a mong jah msuuk mtheh kti ni. Lüphi ah nih noh Patiso Johaana patisoa mong däk ni ah kshing ham. 26 Kyüh kyook ei käh poh laang lü Sangsiim ngthei naak kyonga jah msuuk mtheh kti. Phyiki Lah jah Aküüi Lah noh ah nih-a pyen kshak ngja-nih lü Apolüh sun ah nih ima ah nih seh püi. Ah nih nih noh sha lü ngya ktia Pangsiima mong ah nih msuh mtheh. 27 Apolüh sun Kärih hnea sit hlü lüta Ephet mlüh-a ka be nae noh Apolüh üng ktha jah pelü Kärih hnea vek kti akläke noh Apolüh ah nih dou daan vaia ah nih yuk peet u. Apolüh phavaai lüta Pangsiima bä naak üng jum ei lok ktie sun ah jah ku ei pyei. 28 Sangsiim shum ei lü Jeishüh hin aksang ksanga Khrito ni ati sun ah jah mhnüh mtheh. Asun kba su ah kkhyü mkha üng Jüdah-ea ngngaih mkhye sun kkhyaang pä ma-a angtea ah jah kshing hmat shak be.