17
Kona Amphi Polih mlüh-a kkhyüh Apolüh Ni mlüh üng sit nih lü Teshah Lonih mlüh phavaai kti xooi. Asua Jüdah-ea Sangsiim ngthei naak kyong vek kti. Polüh ta ah thoon khoi ng'yüia Sangsiim ngthei naak kyonga lut kti. Pangsiim ngam püi mhnüüp tä lü Sangsiim shum ei lü Khritoa mong ah jah ngthäh ngkhyah püi sun mhnüüp kthum lohnüh kti. “Khrito hin khui kha lü thi-yah kkhai ni. Thih naaka kkhyüh xüng lobe yah kkhai” tilü Sangsiim üng msäp msäp lü angkyaaia ah jah mtheh. “Kei noh nah nih ma-a tuh kah pyena Jeishüh hin Khrito ni” tilü ah jah msuh mtheh. Akhäk noh jum ei lü Polüh jah Shilah da ngpüi lok kti xooi. Pangsiim hjok khah lok kti Kärih mjü kho hah jah nglou ngthang kti nghnu mi nu akhäk phi jum ei lo-ulü Polüh jah Pana Pa da ngpüi lok ktie. Jüdah-e ta ngkeei ngku lo-ulü kkhyaang klaai jah mkhääm lü mlüh k'uma sit hü ktie. Jah mkhyüh mkyook she sham lü ngpyaang hü ktie. Jasoona ah nih shuia ima anäänga lut ulü Polüh jah Shilah sun kkhyaangea ma-a jah kaih vaia ah nih jah hjap. Am jah shui hmu-ulüta Jasoon jah Khritjaan be nae akhäk mlüh-a khong mangea veeia ah nih jah kaih u. “Aana kkhyaang xooi noh khyong pe naküta jah kso ksik hü nih lü tuh-a ta nih nih-ea mlüh phi phalo hnüh ve ni. Jasoon noh asu xooi jah kkhin nak kti. Kesha shang phuhlanga mkhyah mtaang abäng jah kpet mjak nih lü Jeishüh-a ah nih shui shang phuhlang mat vek kti ni tik kti xooi” tilü ngpyaang ktie. Asuna kkhyü üng kkhyaang päe jah mlüh khong mange ah nih jah mhläk u. Asun üng ta Jasoon jah be nae sun jah ngloh shak ulü ah nih jah hlät u.
10 Mthan lolüta be nae noh Polüh jah Shilah sun angshenga Peria mlüh-a ah nih jah tüih u. Pha nih lüta Jüdah Sangsiim ngthei naak kyonga sit kti xooi. 11 Peria mlüh-a vek kti Jüdah-e ta Teshah Lonih mlüh-a kaea kthaka ah nih ngnei jen kti. Asue noh ta Pangsiima kkhyü sun xe xok nalü su ngngaai ktie. Polüh noh ah pyen sun aksang mä, am sang kti mä ah nih kshing vai ua amhnüüp tä lü Sangsiim üng mtu mtäng ktie. 12 Asuna thoon lü Jüdah kkhyaang kho hah noh jum ei lok ktie. Nglou ngthang kti Kärih nghnu mi jah kpa mi kho hah-e noh phi jum ei lok ktie. 13 Lüphi Teshah Lonih mlüh-a vek kti Jüdah-e noh Peria mlüh-a Polüh noh Pangsiima kkhyü kpyaü kti atia ngjak ktie. Lo-ulü kkhyaang pä ah nih jah mhlon msook u. 14 Asun üng ta Polüh sun angshenga mpang lai tui pei da be nae noh ah nih tüih u. Shilah jah Timotih ta Peria mlüh-a ve-ei hüt kti xooi. 15 Polüh tha vaai ktie noh Athen mlüh säpa ah nih läk u. Polüh noh ta tha vaai kti ah nih seh be u üng “Shilah jah Timotih akjaanga lokom nih” tilü ah jah sük.
16 Polüh noh Athen mlüh-a Shilah jah Timotih ah jah mtäh üng mlüh k'uma mhnama lup kking be ei kti hmulüta asun noh ah mthin bi pi pi kti ni. 17 Asuna thoon lü Sangsiim ngthei naak kyonga Jüdah kkhyaange jah Pangsiim hjok khah lok kti kkhyaang mjü kse-ea dä ngthäh ngkhyah ktie. Mlüh kshuunga phi amhnüüp tä sit hü lü lam sit ei ktie mah mah ngsi ngjaang ktie. 18 Ephih Kuh jah Satoih-a ah nih shui angvaaia msuh mtheh läk kti akhäk phi Polüh mah mah ngthäh ngkhyah ktie. Akhäke noh ta “I phi am kshing xa lü pa kkhyap kti hin noh ta i a ngkho pyen hlü kkhe ve ja” ah nih ti u. Akhäk noh ta “Akse-ea pea ka mhnamea monga mäi ni” tilü ah nih pyen u. I lüni ti ta Polüh noh Jeishüh-a mong jah ah thoh naak bea mong kpyaü hü ktia thoon lü ni. 19 Asun üng ta Polüh sun Areh msuunga kong si ngkhääm ktiea veeia ah nih seh püi u. “Nang noh nah pyen hü nah jah msuh mtheh akthaai hin kah nih kshing hlü ktie ni. 20 Nang noh nah pyen kah nih ngjaak akhäk kah nih phäh-a ta mün kshe pi pi ni. Ahin i a ngkho ati sun kah nih kshing hlü ktie ni” tilü ah nih kthäh u. 21 I lüni ti ta Athen mlüh-a kae jah ah nih yelie noh msuh mtheh akthaaia ngkho shalü ngngaai ngja-in hlü tong ulü asuna ngkho kking sun ngthäh ngkhyah ktie. 22 Polüh noh ta Areh msuunga ngdüüi lü “Athen kkhyaangeo, nang nih-e hin noh mhname jah lei shong naak üng nah nih mtun ktha ei kkhüt ktie ati sun kah hmuk kti ni. 23 Nah nih mlüh kshuunga kah ngxo hü üng nah nih hjok khah naak ime kah jah büh hü. ‘Am kah nih kshing ua mhnam nua phäh-a’ tilü yuk u kti lü hjok khah naaka hnün phi kah hmuk kti ni. Nang nih-e noh käh kshing xa lü nah nih hjok khah u sun kah nih ning mtheh lok ktie ni. 24 Aana kho mdek jah kho mdek kkhaana ve naküt kti jah mhnün mseng ktia Pangsiim hin kho mdek jah kkhaan khoa Booi Pa ni. Ah nih sun kkhyaanga shaka hjok khah im nu üng um kti am ni. 25 Ah nih noh kkhyaange naküt üng shak ni, ngxü ni, akve abäng naküt ah jah peet päih ni. Asuna thoon lü Pangsiima phäh-a kkhyaang noh poh peet vai am hlü. Pangsiim mbei mbook vai phi am hlü kuung. 26 Kkhyaang mat däk üng kkhyaang mjü kküm abäng naküt jah ngtüüi ngdoon shak lü kho mdek kphyut säpa ah jah ve hü shak. Ah nih ve naak vaia khyong pe-e phi, ah nih xün naaka ksüün phi ah jah nanüüt yaan peet. 27 Kkhyaange noh Pangsiim sun shui hjap ulü ah nih hmuh yah vai ua Pangsiim noh asun kba abäng piit pyaang kti ni. Angshaai ngshaaia ta Pangsiim hin nih nih kkhyaange üng akthuuk nua vek kti am ni. 28 Kkhyaang mat noh ah pyen ta ‘Pangsiim üng nih xüng kti, nih koot laat kti, nih ve soh kti ni’ ah ti. Nah nih kshuunga kkhui shui kti akhäke noh ta ‘Nih nih-e hin Pangsiima mjü mjoonge ni’ tilü ah nih pyen u. 29 Pangsiima mjüa nih thoon nih nih-e noh kkhyaang noh nih suum saak khyaih khoh üng nih piit pyaanga xüi lup, ngui lup, lung lup üng Pangsiim hin täng ktia käh su ngngaih laang vai ni. 30 Kkhyaang noh am ah nih hmat ham üng Pangsiim noh am jah kbäü ei lüphi tuh-a ta päta mkhye naak hmu-ei lü vuuk be ua tilü khyong pe naküta vek kti kkhyaang abäng jah mtheh mkhyah hnüh kti. 31 I lüni ti ta ah msoona kkhyaang üng nghngi siim sa naküt pyuun naaka thuum üng si jaang kkhai ni. Asuna mhnüüp phi ah nüt yaan pääng ni. Pangsiim noh ah msoon sun thih naaka kkhyüh ah xün shak bea phäh üng kkhyaang naküt jah si jaang ngkäih kti ati sun ngshing ngte shak kti” tilü Polüh noh ah pyen. 32 Polüh noh thih naaka kkhyüh thoh bea mong pyen lüta akhäk noh ah nih yaih ei. Akhäk noh ta “Aana ngkho nah pyen hin kah nih ngngaai hlü be tü ktie ni” ah nih ti u. 33 Asun üng Polüh ah nih ngkhääm naaka kkhyüh sit be kti. 34 Akhäke ta Polüh mah mah nglooi ei lü jum ei lok ktie. Asue üng Areh msuunga kong si üng ka Tion Nisüh ni, Tamarih-a ah nih shui nghnu mi mat jah akse-e akhäk ngpüi lok ktie.