1 Polüh ta Debe mlüh jah Lüsata mlüh-a phavaai kti. Asua Timotih-a ah nih shui u jum ei kti mat vek kti. Ah nu ta jum ei kti Jüdah mjü ni. Ah pa ta Kärih mjü ni. 2 Timotih sun Lüsata mlüh jah Ikho Nih mlüh-a vek kti be nae noh ah nih mküüi mkhyah ei u ni. 3 Polüh noh Timotih sun seh püi vai mkhüh na-lüta vun moih ah poh peet. I lüni ti ta asuna khyonga vek kti Jüdah-e noh Timotih-a pa Kärih mjü ati sun abäng noh ah nih kshing u. 4 Ah nih nih-e sun mlüh kho hah-a sit hü ulü ah nih seh naak hü naküta Jeirüh Shalema vek kti ngshäe jah shaang ngsiim sange noh ah nih mkhyah-a thuume sun jum ei ktie üng ah nih läk vai ua ah nih jah msuh mtheh. 5 Asun üng shaang ngsiime jum ei naak üng ngkhääng ngpaang lo nak nak ulü amhnüüp tä lü pung lo däm däm ktie.

6 Asha hnea thang kdo kkya ah nih kpyaü vai Mkhyangsiim noh jah ngya lüta Kalatih jah Phyü Kih hnea sit ktie. 7 Müshia hne pei ah nih pha vaai üng Pithü Ni hne da lut vaai hlü ulüta Jeishüh-a Mkhyangsiim noh ah jah ngya be tü. 8 Müshia hne nglüüm vaai ulüta Taroah mlüh phavaai ktie. 9 Asuna mthan üng Polüh noh Pangsiima mhnüh mdan hmuk kti. Make Tonih kkhyaang mat noh ngdüüi lü “Kei nih Make Tonih hne da pek lolü jah ku ei loa” tilü nghui nak kti sun Polüh noh ah hmuh. 10 Polüh noh asuna mhnüh mdan ah hmuh jah ta “Pangsiim noh nih nih-e hin Make Tonih kkhyaangea veei thang kdo kkya jah kpyaü hlü shak kti ni” tilü mkhyah u ngüshe Make Tonih hne da sit kkhaia ahunata kah nih ngpyaih xat ktie.

11 Taroah mlüh-a kkhyüh mhlüüi kdäm üng Sama Tarake tui shonga ngdang te tea sit u ngüshe akho ngooi üng Nah Polih mlüh kah nih phavaai ktie. 12 Asuna kkhyüh Philipih mlüh-a kkong lam üng kah nih sit ktie. Philipih mlüh hin Make Tonih hnea nglou ngthang ktia mlüh ni. Romah-ea ngnam shak ni. Asua akhäk vei kah nih om ktie. 13 Pangsiim ngam püi mhnüüp üng mlüh kho kpung mlik tui peia Jüdah-ea hjok khah naak ave naak khoia kah nih sit ktie. Ngshut u ngüshe ngkhääm lok kti nghnu mie mah mah kah nih ngsi ngjaang ktie. 14 Lütah-a ah nih shui nghnu mi mat vek kti. Asun noh kah nih pyen kshak ngngaai hlü kti. Lütah noh Thia Tira mlüh-a ka ni. Asua akdo bok shui shak shen jooi tulü vek kti. Ah nih noh Pangsiim hjok khah lü Pangsiim noh Polüh-a msuh mtheh naak sun su ngngaai kkhaia ah mlung kkyoong ah piit pyaang pääng ni. 15 Lütah jah ah kkyoonga ka abäng noh patiso khaam ei ma ulü Lütah noh “Kei hin aksanga Booi Pa kah jum ei ktia nah nih ngngaih u ta kah ima kaai lo ua” tilü kei nih-e sun ashi hlinga ah jah khü.

16 Mhnüüp mat üng ta hjok khah naaka kah nih seh shoa, kho yaai noh vaan nalü malam ah pyen shak nghnu mi sa mat kah nih hmuh u. Ah nih noh kkhyaangea malam ah jah pyen peet üng ah mah-e jah soon taai shak kti. 17 Asuna nghnu mi sa noh Polüh jah kei nih-e jah läk hü hü lü “Ahie hin ak'hlüng boka Pangsiima jah xüh shoh-e ni. Ahie noh nang nih üng kuum kyan naak lam nih kpyaü lok ktie ni” tilü ngpyaang kti. 18 Asun kba kho mhnüüp kho vei thoon lolüta Polüh noh mshi mshan lolü ah hnu da ah hei tou. Kho yaai sun üng “Jeishüh Khritoa ngming üng ahina nghnu mi sa-a kkhyüh shota, kei noh kah ning kshät kti ni” tilü ah mtheh. Kho yaai ahunata shot kti. 19 Ah mah-e noh ta ah nih üng xüi ah nih yah naak vaia mkot ngdet kti sun kshing ulüta Polüh jah Shilah-e sun jah man lü mlüh nglunga khong mangea ve naaka ah nih jah kaih u. 20 Romah aso-yah booiea veeia jah kpha ulüta “Ahie hin Jüdah kkhyaange ni. Nih mlüh k'uma kso ksik lok ktie ni. 21 Nih nih-ea thuum seen üng am nglooi kti kpyaü hü ktie ni. Nih nih-e hin Romah-a nih thoon ulü am nih shum ei khoh u. Am nih läk lam khoh u” tilü ah nih jah kbäü ei u. 22 Kkhyaang päe sun jah kpet mjak naak da ngpüi ktie. Aso-yah booie noh Polüh jah Shilah-a shui shak jah shuut phyam-in lü yüüi ngkhep üng ah nih jah te vaia Romah ngtuk kpoh-e ah nih jah xüh. 23 Jah kpaai poot poot ma lü khupa k'uma ah nih jah pheh. Khup k'up üng ah jah mtäh kyet vaia ah nih sük hüt u. 24 Khup k'up noh ah nih sük hüt kona khupa ak'um bok boka jah talü kkhyo üng ah nih jah shuk kyet. 25 Mthan nglunga Polüh jah Shilah noh tä sham nih lü Pangsiim mküüi mtou naak ng'äie msuuk kti xooi. Khup üng kyum hnga kti kkhyaang kse-e noh phi ngngaai ktie. 26 Ahunata ngkhyü ngshüün lolü khup ktunge ngshüün lopyei ktie. Kshoh naküt ahunata nghmong-in lok ktie. Khup kkyume ah nih jah khoon khih naak mthi yüüi abäng ngshuut ngphyam-in lok ktie. 27 Khup k'up xak lolüta khup kshoh nghmong ei päih ktie sun jah hmulü khup kkyum abäng sen päih ktiea ah shui. Asun üng ta ksim peem üng ka ksim kshet lü ah pät noh ah pät hnim ei kkhaia ngpyaih xat kti. 28 Polüh noh ta “Käh! Käh! Käh mhleem eia, kah nih bäng kah nih vek ktie ni” tilü ngpyaang-in kti. 29 Khup k'up sun noh mei kshooi jah tong lü ak'uma dong lü lut vaai kti. Polüh jah Shilah-a kho kuunga pyüp pyüp ei lü ngbok-in kti. 30 Polüh jah Shilah sun kho kpunga jah lo püi lü “Angvaaio, kuum kyan naak kah yah vaia i kah poh yah kkhai ni” tilü ah jah kthäh. 31 Ah nih noh “Booi Jeishüh jum eia. Nah pät jah nah kkyoong noh kuum kyan naak nah nih yah kkhaie ni” tilü ah mtheh. 32 Pangsiima kkhyü sun ah pät jah ah ima ve naküt kti üng ah nih jah mtheh. 33 Asuna ksüün k'um kuung üng ah nih mneh mnang jah mthih peet ma lü khup k'up sun jah ah kkyoonge mah mah patiso khaam ei ktie. 34 Kona Polüh jah Shilah ah im kkhaana jah kaai püi lü ah jah mbei mbook. Asun üng apät jah ah kkyoonga Pangsiim jum ei lo-ulü je kyai kkhüt ktie. 35 Akho ngooi üng ta Romah aso-yah booie noh “Ah nih nih jah hlät u she” tilü ngtuk kpoh-e üng ah nih jah mtheh vaai shak. 36 Khup k'up noh Polüh-a veeia “Romah aso-yah-e noh nang nih Polüh jah Shilah ning jah hlät vaia ah nih mkhyah u ni. Asuna thoon lü lut lolü akdiim kdeih-a sit hnüh nih-a” tilü ah pyen. 37 Polüh noh ta ngtuk kpoh-e üng “Kah nih mong am jah si jaang xa lü kkhyaangea ma-a ah nih jah te u. Kei nih xooi ta Romah kkhyaanga ngshing ngte naak kah nih ta-ei kti ni. Asun kba thak vai am nilü khup üng phi ah nih jah pheh ham ktoih u ni. Tuh-a ta kei nih hin ampyua ah nih jah tüih hlü u sun ta am thoon shoom. Romah booie ah nih päte lo-ulü jah hlät lo yah kkhaie ni” tilü ah pyen. 38 Ngtuk kpoh-e noh Romah booie ah nih jah va-mtheh be u. Polüh jah Shilah noh Romah kkhyaanga ngshing ngte naak ta-ei kti xooi ati sun kshing lo-ulüta sääi ktie. 39 Asuna thoon lü ah nih pät lo-ulü ah nih jah phok be. Khupa kkhyüh jah mhlät ulü mlüh ah nih shot taak vaia ah nih jah nghui naak. 40 Polüh jah Shilah ta khupa kkhyüh lut lolü Lütah-a ima sit kti xooi. Be nae jah hmu nih lü ah nih ktha-a phya naak vai pyen lü mlüh-a kkhyüh shot kti xooi.