1 Polüh jah Pana Pa Ikho Ni mlüh-a pha nih lü Jüdah Sangsiim ngthei naak kyonga lut vaai nih lü ah nih jah msuh mtheh. Asun üng Jüdah-e jah Kärih mjü kho hah pa noh jum ei lok ktie. 2 Asuna thoon lüphi am jum ei hlü ktie Jüdah-e noh amjü kse-e jah mhläk ulü Polüh jah Pana Pa ah nih jah sok ei vai ua ah nih jah mhlon msook u. 3 Asua ngshä xooi kho vei ve nih lü ngke kkhyak kyüh kyook ei käh poh lü Booi Pa-a mong lam pyen kshak kti xooi. Booi Pa noh ngshä xooi üng mün sam kshe jah ngshing ngte naak ah nih poh naak vai hiit jah pelü Booi Pa-a bä naaka thang hin aksang ni ti sun kkhyaange üng ah jah mhnüh ni. 4 Asuna mlüh üng kae ngphyäi ngpa-in ulü akhäk Jüdah-e da ngpüi ulü akhäk ta ngshä xooi da pa ktie. 5 Jüdah-e jah amjü kse-e mlüh üng ka khong mange mah mah ngi ulü ngshä xooi sun jah mkhuh mhlih lü lung üng ah nih jah khoong vai ua ngthäh ktie. 6 Asun sun ngshä xooi noh kshing lo nih lü Lükho Ni hnea vek kti Lüsata jah Debe mlüh jah asuna pi pei tui khyonga sen hü kti xooi. 7 Asua thang kdo kkya kpyaü hü kti xooi.

8 Lüsata mlüh-a ah kho kshe mat vek kti. Ah nu puka kkhyüh ah kho ngten lü ahun phi am sit soon hü khoi. 9 Asun noh ngshut-in lü Polüh-a pyen kshak sun ngngaai kti. Ah jum ei naak üng mya be khoh kti ati sun Polüh noh hmu-lü angtea ah büh-in. 10 Polüh noh “Thou lolü angshunga ngdüüia” tilü ah kthai mdäm lü ah pyen. Ahunata ngtoop kshet-in lü ngdüüi kti. Sut ei lü sit hü kti. 11 Kkhyaang päe noh Polüh-a poh mshah sun ah nih hmuh üng Lükho Ni läk üng ngpyaang ngpyet-in ktie. “Mhname kkhyaanga ngsom lü nih veeia kyum lok ktie ni” tilü ah nih pyen u. 12 Asun üng Pana Pa sun ah nih mhnam kdäm Seei Uh-a ah nih shui u. Polüh sun ngsi ngjaang pyen kshak ktia thoon lü Heimeh mhnama ah nih shui u. 13 Mlüh peia Seei Uh-a hjok khah im vek kti. Seei Uh mhnama khotu noh kkhyäi paai jah she mse-e sun mlüh ngvoong mkota ah jah lo püi. Asuna khotu jah kkhyaange noh ngshä xooi sun kkhyäi paai jah pelü she mse üng jah khah kkhaia ngpyaih xat lok ktie. 14 Pana Pa jah Polüh noh asun ah nih kshing lo üng ah nih mlung jah bi lolü ah nih shui shak kteek kkhyeh-in nih lü kkhyaang pä kshuunga dong vaai kti xooi. 15 “Kkhyaangeo, a i a ahin kba nah nih poh ktie ni. Kei nih hin phi nghngi siim ni. Nang nih-ea kba kei nih kkhyaang la la ni. Thang kdo kkya kpyaü kkhaia ahia kah nih lok kti ni. Ahin kba i a am kyah kti hin hoih u kti lü kkhaan kho, kho mdek jah mpang lai tui ni ahina k'uma akve naküt kkhyüng kshei mhnün mseng kti xüng ktia Pangsiim nah nih hjok khah kkhaiea kah ning jah mtheh hlü ktie ni. 16 Ahlaan üng Pangsiim noh kkhyaang mjü naküt ah nih päta mlung ktüüma ah nih ve soh vai ua ah jah hläh-in ni. 17 Asuna thoon lüphi Pangsiim noh ah päta mong sun ah do kya naak üng shak shi lü jah mhnüh kti. Nang nih-ea phäh-a kho aak shak lü msi mna angtheih ksüüna ngthei paai shak kti ni. Pangsiim noh ei ook ning jah pelü ah ning jah je kyai shak ni” tilü kthai kdäm üng ngpyaang kti xooi. 18 Ahin kba pyen mah mah nih lü kkhyaange noh ngshä xooi sun she mse üng ah nih jah khah hlü sun ngyan üng ni ah nih jah mkhyoh hlot. 19 Pisita hne peia vek kti Anti Ook jah Ikho Ni mlüh üng ka Jüdah-e akhäk lo-ulü kkhyaang päe ah nih nih-e da ah nih ngpüi lo vai ua ah nih jah mhlon msook u. Asun üng Polüh sun lung üng khoong ulü “Thik kti ni” tilü mlüh the da ah nih kaih u. 20 Akläke noh ah nih ngvoon-in k'um üng thou lolü mlüh k'uma sit be kti. Angooi üng Polüh jah Pana Pa Debe mlüh-a sit kti xooi.

21 Polüh jah Pana Pa Debe mlüh-a thang kdo kkya kpyaü nih lü kkhyaang kho hah akläkea ah nih jah thoon shak. Kona Lüsata, Ikho Ni, Pisita hnea pei Anti Ook mlüh-e da nglat be kti xooi. 22 Asun üng jum ei ktie ah nih jum ei naak ah ngkhääng vaia phi Booi Jeishüh aksanga ah nih üm naak kyet vai ua phi ah nih jah msuh mtheh. “Nih nih-e hin Pangsiima pe nih pha hlaan ua khui kha kshe nih shoong yah kkhüt kkhaie ni” tilü ah nih jah mtheh. 23 Shaang ngsiim naküt üng shaang ngsiim sange ah nih jah msoon hüt. Tä sham lü ei jeih lü ah nih jum eia Booi Pa-a kut k'uma ah nih jah ap. 24 Pisita hne da sit nih lü Pan Philih hnea phavaai kti xooi. 25 Peka mlüh-a thang kdo kkya kpyaü nih lü Atalih mlüh-a sit kti xooi. 26 Asuna kkhyüh Anti Ook mlüh-a mhlüüi kdäm üng sit be kti xooi. Ahina Anti Ook mlüh-a kkhyüh Polüh jah Pana Pa aksüka käh ah nih kdung ham üng shaang ngsiim noh tuh-a ngpääng ngsaih ktia ah nih bi loh naak sun Pangsiima bä naak üng ah nih jah ap u. 27 Anti Ook mlüh su pha lobe nih lü shaang ngsiim üng kae ah nih jah ngkhääm shak. Pangsiima jah ku ei phi amjü kse-e üng jum ei naak mkot ah jah nghmon peet phi ah nih jah mtheh mkhyah. 28 Asua kho vei pa akläkea hlonga ve-ei kti xooi.