1 Asuna aksüün üng shang phuhlang Herot noh shaang ngsiim üng ka akhäke sut ei lü jah mkhuh mhlih lo kkhüt kti. 2 Johaana be Jakop ksim üng ah lu kkhyük lü ah jah hnim shak. 3 Asun sun Jüdah-e noh ah nih xe naak u sun Herot noh hmulü Peta phi ah jah man shak be tü. Asuna mhnüüp sun kkhaai phoom kka kkhaai kpeh ah nih ei naaka Pooi k'um ni. 4 Peta sun jah man shak lü khupa k'uma ah jah khyum shak. Ngtuk kpoh pä kphyü üng mhnüüp mthan mhläi lü hlaih hlaih lü ah jah mtäh shak. Pä mat üng ngtuk kpoh kphyü siim lok ktie. Herot noh Phyong Pooi angpääng lo üng Peta sun khupa k'uma kkhyüh kshet lü kkhyaang päa ma-a kshü kset lü ah jah hnim shak vaia ah su ngngaih. 5 Peta sun ah nih khyum kyet u. Shaang ngsiim noh ta ah nih-a phäh-a mtun ei kyet lü anghläia nghui ngpha peet ktie.

6 Herot noh akho ngooi üng ta kkhyaang pä ma-a ah kshet vaia amthan üng ngtuk kpoh xooia kkeh-a Peta ip kti. Mthi yüüi nghngih üng ah nih khih u. Khupa mkota phi mtät kti ngtuk kpoh vebe tü ktie. 7 Ahunata Booi Pa-a kkhaan kho ngshä pou lolü khupa k'uma akvaai nu vaai lok kti. Kkhaan kho ngshä noh Peta-a ah kphyeeng msuung kthüng lü ah mthoh. “Angshenga thou loa” tilü ah pyen. Asun üng Peta-a ah kut üng ka mthi yüüi kya-in lok kti. 8 Kkhaan kho ngshä noh “Nah ngsüüp naak üng akdoa ngsüüp eia, kho dok phi ngsuma” tilü ah pyena kba Peta noh ah poh. Kkhaan kho ngshä noh “Nah jih ngvaih lü kah hlonga nah läk loa” ah ti be tü. 9 Peta noh khupa kkhyüh läk kyo lüphi kkhaan kho ngshä noh aksanga mhlät kti ati sun käh kshing lü Pangsiima mhnüh mdan ah hmuh-a ah ngngaih. 10 Ah nih mtät kti pä mat khe nih lü anghngih naak pä phi ah nih khe be tü, akpäih naaka mlüh k'um da ka khup im mthi kshoh nua veei phavaai kti xooi. Asuna mthi kshoh ah pät nghmong ei-in lolü lut vaai kti xooi. Lam mata kkhaana sit nih lü ah nih seh shoa kkhaan kho ngshä ahunata khyük-in lok kti. 11 Peta ngshüüm lolü “Aksanga athoon ve sun ta tuh-a ni kah kshing lo khü. Herota kut k'uma kkhyüh phi, Jüdah-ea ah nih nah poh mshah hlü ua kkhyüh phi nah mhlät mhlang lo kkhaia Booi Pa noh ah kkhaan kho ngshä ah tüih lo ni” tilü ah pyen. 12 Asun kba kshing lolü ah su ngngaih shoa Johaan Marküh-a nu Marih-a ima sit kti. Asua kkhyaang pä ngkhääm ulü tä sham um ktie. 13 Peta noh kshoh ah kkhok. Rotah ngming nak kti ah nih xüh shoh ei nghnu mi sa kshoh da lok kti. 14 Peta-a kthai sun kshing lüta je lo pyei lü kshoh käh nghmong ham lü tä sham ktiea veei dong be kti. “Peta kshoh ma-a ngdüüi kti ni” ah ti. 15 Asune noh “Nang hin nah ng'yo kti ni” tilü ah nih pyen be u. Rotah noh ta “Peta kshoh ma-a ve ksang kti ni” tilü pyen beh beh lüta “Ah nih-a ah ngmüi mkhya va ni khüng vai” ah nih ti u. 16 Peta noh kshoh sun ah kkhok ei lä. Hnua kshoh sun nghmong ulüta Peta sun hmu-ulü mün sam tong ktie. 17 Asun üng Peta noh akthai kdiika ah nih ve vai ua ah kut üng ah jah mhnüh. Booi Pa noh khupa k'uma kkhyüh i hok kba ah mhlät mhlang lo ati sun ah jah mtheh mkhyah. “Ahin hin Jakop jah akse nih be nae üng jah mtheh vaai ua” tilü ima kkhyüh shot lü aksea sit kti. 18 Angooi üng ta ngtuk kpoh-e pyang ma ulü ah nih lu sing ktie. “Peta ta i a thoon kkhai ni” tilü asun siim ngthäh ngkhyah nak ktie. 19 Herot noh ta Peta sun hmuh onga ah nih shui hü yah vaia ah mkhyah. Asuna thoon lüphi Peta sun am hmu-laang u. Herot thüi shei kkhüt lü ngtuk kpoh-e sun jah kshü kset lü ah jah hnim shak. Asun kona Herot sun Jüdah hnea kkhyüh Kesha Reh hnea noong vei vevaai kkhaia ngpyong kti.

20 Türah jah Shiton mlüh-a vek kti kkhyaange sun ah jah thüi shei ei. Asuna thoon lü kkhyaang päa ksah-a sit ulü Herota veei ngkhyum vaai ktie. Herota im khu bük teng kti angvaai Pala Tu ngming nak kti sun Türah jah Shiton kkhyaange da ah ngtung vaia aksüka ah nih hlo kdäk u. Asun kona Herota veei sit ulü ah nih ng'ye be vai ua ah nih nghui naak u. I a thoon lüni ti ta Türah jah Shiton mlüh üng kae noh Herota teng pe üng ka sun shuun jiin ei lü ei o yah ktie. 21 Ah nih miin naak ua kho mhnüüp üng ta Herot sun shang phuhlanga shui shak shui sha-lü Booi ngoh naak üng ngshut lü kkhyaange jah ngsi ngjaang püi kti. 22 Kkhyaang pä noh ta “Ahina kthai hin Pangsiima kkhyü kthai ni, kkhyaanga kthai am ni” tilü ngpyaang ktie. 23 Asun üng ta kkhyaange noh Pangsiim ah nih mküüi mtou vaia ksah-a ah pät Herot sun ah nih mküüi mkhyah ei vai u hlü ei lü Booi Pa-a kkhaan kho ngshä noh ahunata mtaam ah peet ni. Ah kkhon k'uma mkyüüte noh ei ulü thik kti. 24 Pangsiima kkhyü ta nglou ngthang lo däm däm kti. 25 Pana Pa jah Sholüh sun ah nih khuut ma ngpääng lüta Johaan Marküh khü lo nih lü Jeirüh Shalem mlüh-a kkhyüh lobe kti xooi.