1 Kesha Reh mlüh-a Khonei Lüh ngming nak kti Romah kkhyaang mat vek kti. Asun noh Romah ngtuk kpoh-e üng “Italih” ngming nak kti ngtuk kpoh pä üng ka kkhyaang phya jah up kti. 2 Khonei Lüh noh Pangsiim kyüh kyook lei shong kti ni. Ah pät üng sut ei lü ah kkyoong üng ka abäng noh Pangsiim hjok khah ktie. Jüdah mpyeen kshe-e jah yet mshem lü anghläia Pangsiima veeia tä sham kti. 3 Mhnüüp mat üng ta im kngam shoon ei ksüün üng Pangsiima mhnüh mdan ah hmuh. Pangsiima kkhaan kho ngshä lut lolü “Khonei Lüh-o” tilü ah khü sun angshing ngtea ah ngjaak. 4 Khonei Lüh noh kkhaan kho ngshä sun bük kyet lü kyüh ei lok kti. “Booi Pao, i ja” tilü ah kthäh. Asun üng kkhaan kho ngshä noh “Khonei Lüh-o, kkhyaang nah mpyeen ei phi, nah tä sham hin phi Pangsiim noh mseei kyet kti ni. 5 Tuh kuunga Jopa mlüh-a kkhyaang jah tüüia. Peta ngming na-be kti Shimon jah laak vaai shaka. 6 Peta sun meh vun pyaang kti Shimona ima ngseei kti ni. Asuna im sun mpang lai tui peia vek kti ni” tilü kkhaan kho ngshä noh ah mtheh. 7 Kkhaan kho ngshä sit be kti. Khonei Lüh noh ta ah ima ah jah xüh shoh ei kpa mi nghngih jah ngtuk kpoh mat ah veeia ah jah khü. Asuna ngtuk kpoh sun noh ah pät mtät lü Pangsiim hjok khah ktia phi thoon kti ni. 8 Khonei Lüh noh kkhaan kho ngshäa pyen naküt sun jah mtheh mkhyah lü Jopa mlüh-a ah jah tüih. 9 Sit ulü angooi üng kho phi mhnüüp lü Jopa mlüh-a pha vaai hlü hnüh ktie. Asun k'um üng Peta sun im ktih kkhaana Pangsiim hjok khah kkhaia kaai kti. 10 Buh noh kkhyoot ei tong hnüh kti. Ei ook ah nih pyaan peet k'um üng Pangsiima mhnüh mdan ah hmuh. 11 I ni ti ta kkhaan kho nghmong lü kkhaan khoa kkhyüh akkit üng mana mäi jih nu ngsuun nu kya-in lok kti ah hmuh. 12 Jih nu suna k'uma kkhyüng kshei amjü kküm Peta noh ah jah hmuh. Kho mdeka kkhaana ngjooi hü ktie kkhyüng ksheie phi, kkha amjü mjü phi vek ktie. 13 Pangsiima kthai noh “Petao, thou lolü jah hnim eia” tilü ah pyen sun ah ngjaak. 14 Peta noh ta “Ka, asun kba am ni, Booi Pao. Am ngsiim ngsaih kti jah mtuih mleh kti sun am ei khoi ngtu ngü” tilü ah pyen be. 15 Akthai noh ta “Pangsiima ngsiim ngsaih shak sun mtuih mleh kti tia käh ngngaaia” tilü ah pyen be tü. 16 Asun kba kthum vei kthai lolü asuna jih nu sun kkhaan khoa ah jäh be. 17 Peta noh Pangsiima mhnüh mdan ah hmuh sun mün sam tong lü “A i vai mä” tilü ah su ngngaih-in k'um üng Khonei Lüh-a ah jah tüih-e sun Shimona im ksäk ulü mkota phavaai ktie. 18 “Shimon Peta hia kaai kti mä” tilü ngkhü ktie. 19 Peta noh ta Pangsiima mhnüh mdan ah hmuh sun i a joong vai ni tilü asun kking ah ngngaih-in k'um üng Mkhyangsiim noh ngthuh ei püi lü “Ngngaaia, kkhyaang kthum noh ning shui hü ktie ni. 20 Ngdüüi lolü ju-kyuma. Ah nih nih-e hin keia jah tüih lo ni. Nah ngngaih käh up lat shak lü ah nih hlonga jah läka” tilü ah mtheh. 21 Peta noh “Nah nih shui hüa kkhyaang hin kei ni. I a phäh-a nah nih lok ktie ja” tilü ah jah kthäh. 22 Asune noh phi “Romah ngtuk kpoh-e jah up kti Khonei Lüh noh kei nih-e ah jah tüih lo ni. Khonei Lüh ta kkhyaang kdo kkya ni. Pangsiim phi hjok khah kti ni. Jüdah-e abäng noh ah nih mküüi ei ni. Nang üng nghmu nik kti lü nah mtheh mkhyah hlü sun ah ngjaak vaia kkhaan kho ngshä noh Khonei Lüh üng ah mtheh lo ni.” 23 Peta noh asue sun ah jah khü. Jah kkhin nalü asua mthan mat ip ktie. Angooi üng ngpyaih xat lü ah nih hlonga Peta sit kti. Jopa mlüh-a ka jum ei ktie akhäk phi Peta-a hlonga sit hnga ktie. 24 Angooi üng Kesha Reh mlüh-a phavaai ktie. Khonei Lüh noh ah hnuun püi kphyaai be-e phi ah nglooi püie phi jah namkhääm lü jah namtät ktie. 25 Peta im k'uma ah luh lo jah ta Khonei Lüh noh dou vaai lü Peta-a kho kuunga ngbok lü ah mkhät. 26 Peta noh ta man lü ah mthoh be. “Käh thoona. Kei ta, kei kkhyaang la la ni” tilü ah mtheh. 27 Asun kba ah nih ngthuh ei shoa im k'uma lut vaai lü kkhyaang kho hah ah nangkhääm ktie sun Peta noh ah jah hmuh vaai. 28 Peta noh “Kah püieo, kei nih Jüdah-e hin Pangsiim noh ah jah peet thuum seen üng ta, kkhyaang mjü kse-e üng käh ngpüi ngpo, käh lüüi kaai hü vaia vek kti kyo. Asuna thuum sun nang nih-e noh phi nah nih kshing kkhaie ni. Asuna thoon lüphi Pangsiim noh ua kkhyaang phi am ngsiim ngsaih kti ni tilü käh ngngaih yah vaia ah namhnuh mtheh pääng ni. 29 Asuna kyalü, kah püieo, nah nih nah sük lo u sun käh ning jah hai ngüshe kah lok kti ni. Nang nih-e noh ta i a thoon lü nah nih nah khü u ja, tilü kah ning jah kthäh hlü ma ktie ni” tilü Peta noh ah pyen. 30 Khonei Lüh noh “Kah ima tuh ti im kngam shoon ei ksüüna kkhyüh Pangsiim kah hjok khah sun tuh ngooi ta mhnüüp kthum suum lo hnüh kti ni. Ahunata kpa mi mat kah ma-a ngdüüi lok kti. Ah shui shak phi lik lik kti ni. 31 Asun noh ‘Khonei Lüh-o, nanga tä sham sun Pangsiim noh ngngaai ngjalü kkhyaang nah mpyeen ei phi mseei kyet kti ni. 32 Jopa mlüh-a kkhyaang jah tüih lü Peta ngming na-be kti Shimon tuh kuunga jah khü shaka. Peta sun meh vun pyaang kti Shimona ima ngseei kti ni. Asuna im sun mpang lai tui peia vek kti ni’ tilü ah nah mtheh. 33 Asuna kyalü nah veeia angshenga kkhyaang kah jah tüih lo ni. Nah lo hin do pi pi kti ni. Tuh hia kei nih-e hin Pangsiima hmaai ma-a ngkhääm lü Pangsiim noh ah ning pyen hlü shak sun kah nih ngngaai ngjak kkhaie ni” tilü Khonei Lüh noh ah pyen be.

34 Asun üng ta Peta noh “Aksanga Pangsiim hin noh u phi am phyäi te ati sun kah kshin lo ni. 35 Pangsiim kyüh kyook lü ngpyuun ktia kkhyaang ta ua mjü phi nishe Pangsiim noh dou daang kti ni. 36 Pangsiim noh Isare-e üng thang jah kpyaü lo kti ati sun nah nih kshing ktie am ni bä. Kkhyaang naküt jah up kti Booi Jeishüh Khrito üng Pangsiim jah kkhyaang sa-a kkeh-a ng'ye naak ah poh-a thang kdo kkya sun Pangsiim noh ah kpyaü shak ni. 37 Patiso Johaan noh patisoa mong lam ah jah msuh mtheh kona Kalile hnea kkhyüh lü Isare pe abäng üng ngpyaü hü päih kti ati sun phi nah nih kshing pääng u ni. 38 Nasaret mlüh-a ka Booi Jeishüh-a mong lam nah nih ngja-khoi ktie am ni bä. Ah nih sun Pangsiim noh Mkhyangsiim buui lü hiit phi ah peet ni. Booi Jeishüh sun sit hü hü lü kkhyaangea kkhaana akdo bok poh mshah lü Shatan yaai pa-a kut k'uma vek ktie phi ah jah do be shak päih ni. I a thoon lüni ti ta Pangsiima kpüi kpak üng ah poh mshah khoh-a kyak kti. 39 Jeirüh Shalem mlüh-a phi, Jüdah hne abäng üng phi ah khuut poh naküta mong kei nih-e hin noh kah nih shak shi ktie ni. Ah nih nih-e noh ta baan lam ktung üng hneen lü ah nih hnim u. 40 Asuna thoon lüphi Pangsiim noh amhnüüp kthum üng thoh shak be lü ah pou lo shak be ni. 41 Kkhyaang naküta hmaai ma-a Booi Jeishüh ngshing ngte lok kti am ni. Shak shi kkhaia Pangsiim noh ah jah xü kse pääng kei nih-e noh ni Booi Jeishüh kah nih hmuh yah u. Thih naak üng ah thoh be kona ayüma kah nih ei o ham ktie ni. 42 Kkhyaang naküte üng thang kdo kkya jah mtheh vaia phi Booi Jeishüh üng thipääng ktie jah, xüng ham naküt ktie jah si jaang kkhaia Pangsiim noh ah msoona mong suna shak shi kkhaia Booi Jeishüh noh ah jah sük koh hüt ni. 43 Shahma ngsiim abänge noh phi Booi Jeishüh-a mong malam pyen ktie. Jeishüh jum ei naküt ktie sun Booi Jeishüh-a hmaaia phäh üng ah nih mkhye naküt lät päih kkhaie ni” tilü ah pyen.

44 Asun kba Peta noh ah pyen k'um üng Pangsiima kkhyü ngngaai ngjak ktiea mlung k'uma Mkhyangsiim vaang lok kti. 45 Kkhyaang mjü kse-e kkhaana Pangsiim noh Mkhyangsiim buui lü ah jah peeta phäh-a Jopa mlüh-a ka Peta-a hlonga lok kti Jüdah mjü üng ka jum ei ktie sun mün sam tong ktie. 46 A i ni ti ta Mkhyangsiima jah pyen shaka kba aksea läk pyen lolü Pangsiima däm duh naak ah nih mküüi mtou u sun ah nih ngjaak ua phäh ni. 47 Peta noh “Ahie hin nih nih-ea kba Mkhyangsiim yah pääng ktie ni. Asuna thoon lü tui üng patiso ah nih khaam vai sun u noh jah ngya kkhai ni” ah ti. 48 Booi Jeishüh Khritoa ngming üng tui üng patiso ah jah khaam ei shak. Asun kona Peta noong vei ah om be tü ma vaia ah nih nghui naak u.