NGSHÄEA KHUUT
Lükah-a yuk ngshäea khuut poh
1
1-2 Nang Theo Philüh-a veei sa kah yuk lo be tü ni. Khuut ah sut eia kkhyüh lü Pangsiim noh kkhaan khoa ah khü vei säpa Booi Jeishüh-a poh mshah jah ah jah msuh mtheh naak aksüka sa up üng kah yuk lo päih ni. Kkhaan khoa Pangsiim noh ah khü hlaana Booi Jeishüh noh ah jah xü kse ngshäe sun Mkhyangsiima kpüi üng ah jah msuh mtheh.
3 Booi Jeishüh noh ah thih kona kho mhnüüp kphyü kip k'um üng ngshäea hmuh-a pou lo thak thak kti. Booi Jeishüh ah xün be sun ngshäe noh “Balaak mä” käh ah nih ti vai ua angshing ngte kuunga ngshäea ma-a nghmuh kti. Ngshäe noh Booi Jeishüh ah nih hmuh ksang u. Asun üng Booi Jeishüh noh Pangsiima pea mong ah jah msuh mtheh ni.
4 Booi Jeishüh jah ngshäe ngkhääm lok ktie. Asun üng Booi Jeishüh noh “Kah Pa Pangsiim noh nah nih veeia Mkhyangsiim ah tüih lo vaia kkhyü taam kti tilü kah nih ning mtheh khoi ktie ni. Asuna Mkhyangsiim nah nih yah hlaana Jeirüh Shalema kkhyüh käh sit hü ham u bä.
5 Patiso Johaan noh ta tui üng ni patiso ah nih ning peet u. I vei am lo ham Mkhyangsiim üng patiso nah nih khaam ei kkhaie ni” tilü ah jah mtheh.
6 Ngshäe ah nih ngkhääm lo u üng “Booi Pao, tuh ta kei nih Isare-e üng kah nih päta up teng pe nah jah pe-be kkhai mä” tilü Jeishüh ah nih kthäh u.
7 Booi Jeishüh noh “Asun i tüh-a athoon lo vai ksüün kah Pa Pangsiim däk noh ni ah hiit üng ah mkhyah mtaang. Nang nih-e noh ta asuna ksüün sun am kshing khoh u kti.
8 Nah nih k'uma Mkhyangsiim ah vaan lo jah hiit akthaai nah nih yah lok kkhaie ni. Asun üng ta Jeirüh Shalem mlüh üng phi Jüdah hne naküt üng phi Shama Rih hne naküt üng phi kho mdek kphyut säpa keia shak shia nah nih ngdüüi kkhaie ni” tilü ah jah mtheh.
9 Booi Jeishüh noh asun kba ah pyen kona ngshäe noh ah nih büh kyet k'um üng Pangsiim noh kkhaan khoa jäk shoon-in lü kho ngmei noh hloop-in lolüta am hei hmuti u.
10 Jeishüh kkhaan kho da ah ngjäh vaai phät phät sun ngshäe noh ah nih büh kyet um üng shui shak book shui shak kti kpa mi nghngih ahunata ah nih hlonga ngdüüi lok kti xooi. (Kpa mi nghngih sun ta kkhaan kho ngshä xooi ni.)
11 Kkhaan kho ngshä noh ta “Kalile üng ka kkhyaangeo, ahin üng ngdüüi lü kkhaan kho da i nah nih hei tou-in ktie ni. Pangsiim noh kkhaan khoa ah khü Jeishüh hin ah ngjäh nah nih hei hmuh-a kba lobe tü kkhai ni” tilü ah jah mtheh.
12 Asun üng Kshi Dung msuunga kkhyüh Jeirüh Shalem mlüh-a ngshäe sit be ktie. Kshi Dung msuung jah Jeirüh Shalem mlüh sun määng mata säp säp thuuk kti.
13 Jeirüh Shalem mlüh-a ah nih pha üng ta ah nih kaai naak im akkhaan thapa vek ktie. Asune ta Peta, Johaan, Jakop, Antere, Philip, Tomah, Pato Lomüh jah Mate, Aphea sa Jakop, pe ktheem Shimon jah Jakopa sa Jüdah ni.
14 Ngshäe noh nghnu mie jah Jeishüh-a nu Marih ni, Jeishüh-a nae mah mah ngkhääm lü anghläia tä sham ktie.
15 Asun k'um üng jum ei ktie phya mat mku ngkhääm lok ktie. Asunea kshuunga Peta noh ngdüüi lolü ah pyen lo.
16 Peta noh ta “Kah püieo, ahlaan üng Mkhyangsiim noh shang phuhlang Davit üng Jüdah Sakarota mong Sangsiim üng ah nayuk shak. Ah yuk shaka kba kuunga thoon lok kti ni. Jüdah Sakarot noh Jeishüh man ktie üng lam ah jah mshüüm.
17 Jüdah Sakarot hin kei nih ngshäe üng ngpüi kti kyo ni. Khuut jah poh püi kkhaia Booi Jeishüh noh ah xü ni.
18 Jüdah Sakarot noh Jeishüh ah ktuun eia kheen ah yah-a ngui üng mdek hmün mat ah kkhyäih. Asua kyatong lüta ah kkhon nu pook lü ah kkhyü kkhone phi lut lang lopäih ktie.
19 Jeirüh Shalem üng vek kti kkhyaang naküt noh asun sun ah nih ngjaak päih u. Asune noh ah nih läka ‘Aketama’ kho hmün ah nih ti u. Ti hlü ta ‘Thih naaka hmün’ ni.
20 Shalaan ng'äi üng Jüdah Sakarota mong ng'yuk kti ta ‘Ah ima kkhyaang am veti. U noh käh im nah ti she. Ah nih-a poh hlü Pangsiima khuut phi akse noh poh be she’ tilü phi ng'yuk kti.
21-22 Asuna athoon ta nih nih-e üng mat mat ngpüi be lü Booi Jeishüh-a thoh bea mong nih shak shi vai u hlü kti. Asuna kkhyaang ta nih nih-ea hlonga Booi Jeishüh ah ve um naküt üng phi ngkhyüi ngsho yah kkhai. Patiso Johaan noh patisoa mong ah kpyaüa kkhyüh sut ei lü Pangsiim noh Booi Jeishüh kkhaan khoa ah khü vei säpa phi ngpüi yah kkhai ni” tilü Peta noh ah pyen.
23 Asun kona ah nih jah khü u kkhyaang xooi ta Jutüh-a phi ah nih shui Josheo Pasah Pa jah Matiah ni.
24-25 Ngshäe noh “Kkhyaangea mlung ngnei kshing kti Booi Pao, Jüdah Sakarota ksah-a ngshäa thoon be lü khuut poh kkhaia ahin xooi üng nah xü mat jah mhnüh-a. Kei nih-e üng ngkyalü Jüdah Sakarot ah seh naak ngkäih kuunga sit pääng kti ni” tilü ah nih tä sham u.
26 U noh yah hlü kkhe tilü sung keek ah nih ngjuh u. Asun üng Matiah noh yah lü ngshä xalei nghngih-a kshuunga ngpüi lok kti.