TIMOTHI
AM PAUL AH CAGUK ATUMATNAK
Paul's First Letter to Timothy
Asia Minor ah ka khritha ak hmaw chang Timothi cu, anu Jew chang, apa Karik chang ah kiak ci. Ani cu Paul naw Khanpughi ah khuut a bi nak ung bi püi ci la ng'khap püi ciah kia ci. Paul naw Timothi am ca a guk a atumat nak ung amawng cu pathum lawk ci.
Ak htük bäih ah a guk ah ca cu, khrihtabum ah kyong ah ak she ah m'theithang ci gui, am cäi nak gui ah kia ci. Cun ah m'theithang nak cu Jew chang la kä Jew chang ah m'theithang nak ng'caw ciah kia ci. Cun ah a mawng cu khomdek pumsa cu shekak ci, chang tumat cu thuuk ciah hmuhmat nak la ei hlawi nak, kä chu ceimah ne om nak gui awn vah hun nak cu gah hning ci, ciah kia ci. Shin ah ca ung khrihtabum gui ah uk nak la khawihnah nak, khrihtabum ung a gham gui la bilawh püi ci gui ah om ih vai ah mawng, gui phi guk ci. Ak hnu ah, Timothi cu Bawi Khrit ah changshäm k'ni ah a kia vai ah m'cäi nak la zum ciah chang bum gui ah ng'lung ah abi gui vai a van cu am cäi nak ah kia ci.
1
1 Mi Hunbawi Khanpughi la mi ngaih u Jesuh Khrih ah m'hnüt nak awn Bawi Khrih ah düih püi ah ka kia ciah kei Paul naw -
2 Zum nak ung ka hta akcang ah kia ciah Tomithi-am ca ka guk law ci nei:
Mi Pa Khanpughi lah Bawi Khrih Jesuh ah geinsei nak, chimhnat nak la dimdeih nak cu nang ung om sä. Ref 1:2 Lamktu 16:1
Thuvi ciah M'Theithang ci A Khäntam Nak
3 Macedonia ah ka hteh law vai ung ka ning m'cäi ah mäih ah Ephesus ah na om cang vai ka ng'za hlük ci. Chang am shah gui naw thuvi ne m'theithang ci gui nei, cun gui cu, ami ng'düm vai ah na khän gui vai.
4 Ng'cu can düt vai ah kiak ciah pumah-awi m'cu ne ng'shon lam düt khei ci gui cun phi, cun ah kä ami kiak ba vaiah nam cäi gui vai nei. Cun gui cu Khanpughi ah ng'bü nak ah kä kia ci, zum nak kawn vah cun gui hmat vai kiak ci.
5 Cun ah khäntam nak ah a mawng cu, theing ciah nikiom nak, ciim ciah lung ngaih la ng'khän ciah zum nak cu, thawhlet sak nak hlü ah kia ci.
6 Chang am shah gui cu shin ah lam hma u ne, shetkat nak düt ng'cuhcan pyeinsak ci gui.
7 Ngahmi cu Khanpughi ah thukhän saza ah kia hlük ci gui, cun ung phi ami mät ah thu m'kha la ami thu ah a mawng gui cu kä hmat ci gui.
8 Thukhän cu akni ah mang ung nik ciah mi hmat ci.
9 Mik mi naw mi shüm hmat vai cu, thukhän m'hnüt cu chang k'ni gui ah hmawk ah kä kia ci, thukhän m'shet ci gui, om shet ci gui, Khanpughi kä hmat ci gui la cheishoh ci gui, zum nak kä om ne mumcha lam kä shing ci gui, ami nupa ngawn ci gui, chang nagawn ci gui,
10 Pa la pa nu la nu ng'zawpawm düt ne pletbeng ci gui, chang phak ci gui, hleihlak ci gui, kä düng khai ah saksi ci gui la düng ciah zum nak hnu ng'tuk püi ci gui ah hmawk ah kia ci.
11 Shin ah theithang nak cu Thu Ni ung hmu ah Khanpughi ah bämang nak la phruhtheh nak ung ka lawk ciah Thu Ni, Kei naw ka shäu vai ah Khanpughi naw a na ap ah kia ci.
Khanpughi ah Chimgein Nak ah Mawng M'Kümto Nak
12-13 Shin ah bi ka bi nak vai ah thamah nak na pek ciah mi Bawipa Khrih Jesuh cu kam hlüngtai ci nei. Kei naw zanä Bawipa cu ak she ah pyein ne, dukdeu na ne, zoshe na ne, ka kiak man pang ung phi, Bawipa naw kei cu na khinkha sak ne, abi ka bi vai ah nam hnüt sei Bawipa cu kam hlüngtai ci nei. Cun sang ung kei cu zum nak kä om sei, akni akshe phi kä ka hmat ci, cun ah kia sei Bawipa naw kei cu na chimgein ci. Ref 1:13 Lamktu 8:3; 9:4-5
14 Mi Bawipa naw küikyang ciah am gein nak cu nam shum phruk ne, mi Bawi Khrih ung kawng ät nak awn zum nak la m'hni nak phi na pek ci.
15 ‘Bawi Khrih Jesuh cu cheishoh ci gui hun khai ah khmodek khan ah kium lawk ci,’ ciah thu cu düng ciah thu ah kia sei, ak be ah dou ne zum vai ah kia ci. Kei cu ak shekha pi ah ka kiak ci,
16 Cun ung phi Khanpughi naw kei cu nam gein ci, cun ah a nam gein ah mawng cu, ngawi ah Bawi Khrih zum ne ghin nak gah ci gui naw ami thei tu vai ah Bawi Khrih naw a hnimgei nak ah a mawng cu, shekak ciah kei awn am dang ah kiak ci.
17 Ang täi ah ghing ciah Ghangpughang, sih nat nak kä om ci, mik awn kä hmuh thei, tumat bäng ah Khanpughi cu - m'tam khah nak la bämang nak awn hta ng'shon ung om sä! Amen.
18 Kahtapa Timothi, cau profet gui naw nang ah mawng ami pyein man ah mäih ah, kei naw shin ah bi cu khän ne ka ning ap ci. Cun ah thu cu, ng'tuk näng nak ah li la khim ah na mang vai nei.
19 Na zum nak htek ne nam lung ngaih theing ciim sä. Chang am shah gui naw ami lung ung ciim sei kä ngai zäi u ne, ami zum nak cu shet sak ci gui.
20 A cun gui ung Himenaeus la Alexander phi om tuk ci goi. Shin ah mawng naw m'theithang gui sei, nangmi naw Khanpughi ami shetkat nak ami nawng vai ah, kei naw ngahmi cu Satan ah kut ung ka ap gui ci.