THESSALONIAN
CHANG GUI-AM PAUL AH CAGUK AKHNIHNAK
Paul's Second Letter to The Thessalonians
Bawi Khrit a kyum law ba vai ah mawng ngaihtüh nak ahei hei om sei, Thessalonika khrihtabum ung kä dimdeeih ngai ci. Thessalonika Chang gui-am Paul ah Caguk Akhnihnak ung ‘Bawipa ah kyum law nak ah Hnüüp gawk law pyi ci nei,’ ciah zum nak a hma ah mawng cu m'dang ne a guk ah kiak ci. Paul naw cun ah ngaihtüh nak cu düngsak netah, Bawi Khrit kä a kyum law ba pha ung “Ak Shekha Pi,” ah ming ciah lam shüm nak awn, shekha nak la cheshoh nak cu ak hlüngtai säih ah gawk khai nei.
Shin ah ca guk ciah ang düihpüi naw am dang nak cu, shin ah ca phat ciah chang gui cu ami zaica geinvai pang ung phi, Paul la ang khahpüi gui ah mäih ah k'thamah ne ami bilawh vai la nik ciah bi bi nak ung thanah ne ami khüighaat vai ah mawng ah kiak ci.
1
Paul, Silas la Timothi ni naw Mi Pa Khanpughi la Bawipa Jesuh Khrit ung om ci gui ah Thessalonika khrihtabum gui-am ca guk law gui nei;
Mi Pa Khanpughi la Bawipa Jesuh Khrit naw m'gein nak la dimdeeih nak cu ning pe gui sä.
Bawi Khrit a Kyum Law Zah ung M'Khoicha nak Vai ah Mawng
Phäi nau gui aw, nangmi ah hmawk ah ang täi sei Khanpughi cu kami m'kümto ci nei. Cun ah kami bi cu bä ci nei, a i ah kia sei ci ung, nami zum nak cu ng'ghotai law pi ne, nami ng'hni nak tu phi abäkhäk law pi ah hmawk ah kiak ci. Cun ah kia sei keimi naw nangmi ah mawng cu Khanpughi ah khrihtabum gui ung khähghah ne kami pyein ci nei. Nangmi cu k'dukdeiu nak la zaica nak bui awt pang u ne phi nami m'khütnäng nak la nami zum nak ah hmawk ah kami längtang ci nei.
Shin ah abi nak gui ung Khanpughi ah m'khoichaa nak gui cu düng sei, nangmi cu Khanpughi ah kho awn khinkha ciah nami kia lawk khai, a cun ah kho ah hmawk ah nangmi cu nami zaica ci. Khanpughi naw düng nak cu bik khai; ning zaica sak gui ci cu, zaica nak pe gui khai. Nami zaica ciah nangmi gui la keimi gui ah khan ah hüizang nak na pe gui khai. Bawipa Jesuh Khrit cu bämang ciah khanchang gui awn, mei m'lei ah tawt ne ang dang law zah ung Khanpughi naw cun gui cu bik khai. Cun ung Khanpughi hnu ng'tuk püi ci gui la Bawipa Jesuh ah mawng Thu Ni kä ngai ci gui cu Khanpughi naw shetkat sak gui khai. Ngami cu ang täi sei geinvai nak ah shetkat nak ung zaica khai gui, cun cu Bawipa awn ng'pai nak la abawimang nak awn ng'shawng nak ah kiak ci. 10 Cun gui cu ak chang gui ah m'hlüngtai nak la zum ciah chang gui ah m'tamkhah nak gah khai ah a kyum law nak ah kho Hnüüp ung ah kiak khai. Nangmi cun phi keimi ah ning m'thein gui ah ng'thu nami zum ci kia sei, cun ah Hnüüp ung Bawipa cu nami m'hlüngtai m'tamkhah tuk khai.
11 Cun ah amawng ung nangmi ah hmawk ah keimi ang täi sei kami taigü ci. Khanpughi naw a ning khü gui ah mäih ah nami ghin om hning vai ah keimi naw Khanpughi ah kami ning zoih thäh pe guici nei. Ni kiom nak vai ah nami ng'zak hlü avan cu a hlüngtai nak awn ning kümbe sak gui ne, zum nak awn nami bilawh gui nüng phi ning kümbe sak gui sä. 12 A shin ah mawng ung mi Bawipa Jesuh ah ming cu nangmi awn bämang nak gah khai, nangmi phi ani awn bämang nak nami gah khai nei. Cun cu mi Pa Khanpughi Bawipa Jesuh Khrit ah m'gein nak awn ah kiak ci nei.