6
Nami ng'ku gaam Tu Vai
1 Ka Phäi nau gui aw, chang tumat cu a cheishoh ah a kyak ung, Mumcha k'thamah nak om ci gui naw, m'cäi ne nami ng'düng ba sak
vai. Cun cu om ni nak awn nami bi vai. Nami mät phi tüihtok nak
ung kä nami gawk vai ah nami geing nak vai.
2 Nami phuih kawh nami ng'phuih kawh tu püi vai, a cun ah bi ne Bawi Khrit ah thukhän cu nami läk vai.
3 Amät bä ciah ngai ci cu, amät kä bä ciah a kyak law ung, amät naw amät m'hleei ciah kyak ci.
4 Ak chang sing naw amät ah bi cu amät naw am htei vai. Abi cu nik ciah a kyak ung, chang hei ah bi awn kä
m'tumtäng-en ne, amät ah bi ung amät ang zum vai.
5 A i ah kyasei ci ung ak changsing naw amät ah phuih phäh phäh a phuih vai ah kyak ci.
6 Khrihta thuni ng'theithang tuk ciah chang naw, m'thei tuk ci-am ngui ghui khawh chaam cu a peit taak vai nei.
7 Ang lih ng'lat ah kä nami om men vai, a u chang naw phi Khanpughi kä m'hleei hlawt khai. Chang cu amät ah geit bä bä
amät naw khäm ba khai.
8 M'dek chang ah ng'zak hlü ah m'dek ung geit ci naw, sih nak ah a vuipai cu khäm ba khai;Mumcha ah ng'zak hlü ah ng'lei ung geit
ci naw, ang täi ghin nak ah a vuipai cu khäm ba khai.
9 Cun ah kyasei kä cümbawng ne ak ni ah mi om ih khai: mik mi naw kä mi hnu ng'hlah taak ah a kyak ung, akhin a gawk law hnüüp ung a
vuipai cu mi khäm khai.
10 Cun ah kyasei mik mi naw akhin mi gah päng ung, chang ah hmawk ah ak ni cu mi bik khai, zum ci gui ah kyong khui ah hmawk ah ak
tung pi ah mi bik khai.
11 Ka mät naw ka kut awn, a i hlawk ah däm ciah calung gui gu ne ka ning m'khäh law gui cu,teng vä!
12 Nang mi naw vun ah nak nami bi vai ah ning ling na gui ci gui cu, ak pung bi nak awn khähghah hlük ci gui ah kyak ci nei.
Ngahmi cun ah ami ling cu, Bawi Khrit ah kutlam tung ah hmawk ah
k'dudeiu nak ami aut vai ami kyih su ah kyak ci nei.
13 Vun ah vai ah ling ciah chang gui ge naw, thukhän cu kä läk ci gui nei. Vun ah nak nami bi nak awn khähghah
hlü u netah, ami ning bi sak gui ah kyak ci.
14 Kei läi cu mi Bawipa Jesuh Khrit ah kutlam tung ah hmawk bäng ah ka khähghah khai nei. Bawi Khrit ah kutlam tung ah hmawk ah
khomdek cu kei ah phäh ah sik ci, kei cun phi khomdek ah phäh ah
ka sik ci.
15 Chang tumat vun ah vai la kä ah vai cu ak tung ah kä kyak ci, ak thai ah ang tüi vai cu ak tung ah kyak ci.
16 Shin ah mawng gui läk ne ghin püi ciah chang gui la Khanpughi ah chang gui ah khan ah dimdeeih nak la m'gein nak cu om sä!
17 Khüm nak ah: cän kawn ah a u naw phi kä na k'shedam men ah ba sä, a i ah kyasei ci ung ka pumsa ung om ciah kang'gaai gui naw,
kei cu Bawi Jesuh ah khlei htein ah ka kyak cu m'dang ci nei.
18 Phäi nau gui aw, mi Bawipa Jesuh Khrit ah m'gein nak cu nami khan ah om sä. Amen.