ဆာလံ။ 85
1 အိုထာဝရဘုရား၊ ကိုယ်တော်သည်ပြည်တော်ကိုနှစ်သက်၍၊ သိမ်းသွားခံရသော ယာကုပ်အမျိုးကိုပြန်ရောက်စေတော်မူပါပြီ။
2 လူမျိုးတော်၏မတရားမှုကိုဖြေလွှတ်၍၊ အပြစ်ရှိသမျှကိုဖုံးအုပ်တော်မူပါပြီ။
3 ဒေါသမီးကိုအကုန်အစင်ရုပ်သိမ်း၍၊ အမျက်တော်အရှိန်ကိုလွှဲတော်မူပါပြီ။
4 အကျွန်ုပ်တို့ကိုကယ်တင်ပိုင်ရှင်ဘုရားသခင်၊ ပြန်ကြွ၍၊ အမျက်တော်ကိုငြိမ်းစေတော်မူပါ။
5 အစဉ်အမြဲအမျက်တော်ထားလျက်၊ အစဉ်အဆက်စိတ်တော်မပြေဘဲ၊ နေတော်မူမည်လော။
6 ကိုယ်တော်၌လူမျိုးတော်ရွှင်လန်းရစေရန်၊ ရှင်ပြန်စေတော်မူမည်မဟုတ်ပါလော။
7 အိုထာဝရဘုရား၊ ကရုဏာတော်ကိုပြ၍၊ ကယ်တင်တော်မူခြင်းကျေးဇူးကိုသနားတော်မူပါ။
8 ထာဝရအရှင်ဘုရားသခင်မိန့်တော်မူကြောင်းကြားပါရစေ။ မိုက်မဲရာသို့နောင်မပြန်ကြလျှင်၊ ကြည်ညိုသောလူမျိုးတော်အား၊ ငြိမ်သက်ခြင်းသတင်းကိုမိန့်တော်မူလိမ့် မည်။
9 ငါတို့တိုင်းပြည်၌ ဘုန်းတော်ကိန်းဝပ်စေခြင်းငှာ၊ ရိုသေသူတို့အနီး၊ ကယ်တင်တော်မူခြင်းကျေးဇူးတည်လျက်ရှိ၏။
10 ကရုဏာနှင့်သစ္စာတော်ဆုံမိ၍၊ ဖြောင့်မတ်ခြင်းနှင့်ငြိမ်သက်ခြင်းနမ်းကြပြီ။
11 သစ္စာတော်သည်မြေကြီးကပေါ်ပေါက်၍၊ ဖြောင့်မတ်ခြင်းလည်းကောင်းကင်ကငုံ့ကြည့်ပြီ။
12 မုချအားဖြင့်ထာဝရဘုရားသည်၊ ချမ်းသာကိုသနားတော်မူ၍၊ ငါတို့နယ်မြေပြန့်ပြောလိမ့်မည်။
13 ဖြောင့်မတ်ခြင်းသည် ရှေ့တော်ကချီသွား၍၊ ခြေတော်လှမ်းရာလမ်း၌ ပို့လိမ့်သတည်း။