1 ဗိုလ်ခြေတို့အရှင်ထာဝရဘုရား၊ စံရာတော်သည်၊ အလွန်နှစ်သက်ဖွယ်ဖြစ်လှပါ၏။ 2 အသက်ရှင်တော်မူသောဘုရားထံ၊ နာမ်ခန္ဓာ၊ ရုပ်ခန္ဓာပါကြွေးကြော်ရာ၊ ထာဝရဘုရား၏တံတိုင်းတော်များကိုအကျွန်ုပ်စိတ်ဝိညာဉ်တသ၍မူးမော်လျက်ရှိလေစွတကား။ 3 အိုဗိုလ်ခြေတို့အရှင်ထာဝရဘုရား၊ အကျွန်ုပ်၏ဘုရင်၊ အကျွန်ုပ်၏ဘုရားသခင်၊ စာငှက်များသည်၊ အသိုက်ကိုလည်းေကာင်း၊ ပျံလွှားများလည်း၊ သားငယ်မွေးရာသိုက်မြုံကိုလည်းေကာင်း၊ ပူဇော်ရာပလ္လင်တော်များအထက်၊ ရှာ၍ရပါပြီ။ 4 ကိုယ်တော်ကိုအစဉ်ချီးမွမ်းခွင့်ရသည့်အလျောက်၊ ဗိမာန်တော်၌နေထိုင်ရသူတို့သည် မင်္ဂလာရှိကြပါ၏။

5 လမ်းတော်မြတ်များကိုနှလုံးသွင်းလျက်၊ ကိုယ်တော်၌အားထားသောသူ၊ 6 ငိုကြွေးရာချိုင့်ကိုလျှောက်သွားစဉ်၊ မိုးဦးကြောင့်ကောင်းကြီးများလွှမ်းခြုံ၍၊ စမ်းရေထွက်ရာအရပ်ဟုမှတ်သားသူတို့သည်၊ မင်္ဂလာရှိကြ၏။ 7 အစဉ်တစိုက်အားတိုးတက်၍၊ ဇိအုန်မြို့တွင်ဘုရားသခင်ရှေ့ဖူးမေျှာ်ရကြပါ၏။ 8 ဗိုလ်ခြေတို့အရှင်ထာဝရဘုရားသခင်၊ အကျွန်ုပ်ပဌနာကိုနာခံတော်မူပါ။ ယာကုပ်၏ဘုရားသခင်၊ နားညောင်းတော်မူပါ။ 9 အကျွန်ုပ်တို့ဒိုင်းလွှားဖြစ်တော်မူသောဘုရားသခင်၊ ရှုကြည့်လျက်၊ ဘိသိက်တော်ခံမင်း၏မျက်နှာကို ထောက်ရှုတော်မူပါ။ 10 တံတိုင်းတော်အတွင်း၌ တစ်ရက်တာသည်၊ ရက်ပေါင်းတစ်ထောင်ထက်မြတ်သည့်အလျောက်၊ လူဆိုးတို့တဲများတွင် တစ်ဘဝလွန်သည်ထက်၊ အကျွန်ုပ်၏ဘုရားသခင့်ဗိမာန်တော့်အနီးပျပ်ဝပ်ခွင့်ကို သဘောကျပါ၏။ 11 ထာဝရဘုရားသခင်သည်၊ နေနှင့်ဒိုင်းလွှားဖြစ်တော်မူ၏။ ထာဝရဘုရားသည်၊ ကျေးဇူးတော်နှင့်ဘုန်းအသရေကိုသနား၍၊ စုံလင်စွာကျင့်ကြံသူတို့အား၊ ကောင်းသောအရာကိုငြင်းတော်မူမည်မဟုတ်။ 12 ဗိုလ်ခြေတို့အရှင်အိုထာဝရဘုရား၊ ကိုယ်တော်၌ကိုးစားသောသူသည် မင်္ဂလာရှိပါ၏။