ဆာလံကျမ်း 42 (MGB)

ဆာလံ။ 42

ဒုတိယတွဲ။

1 အိုဘုရားသခင်၊ ချောင်းမြောင်းရေကိုသမင်ဒရယ်တောင့်တသကဲ့သို့၊ အကျွန်ုပ်စိတ်ဝိညာဉ်သည်၊ ကိုယ်တော်ကိုတောင့်တပါ၏။ 2 ငါ့စိတ်ဝိညာဉ်သည်၊ အသက်ရှင်တော်မူသောဘုရားသခင်ကိုငတ်လှ၏။ မည်သည့်အခါမှ ရှေ့တော်သို့ရောက်၍၊ ဖူးမေျှာ်ရပါမည်နည်း။ 3 သင့်ဘုရားကား၊ အဘယ်မှာနည်းဟုနေ့ရှိသမျှလှောင်ပြောင်ကြစဉ်၊ ငါ့မျက်ရည်သည်နေ့ညဉ့်မပြတ်စားသောက်ဖွယ်ဖြစ်ရလေစွ။ 4 ဘုရားသခင့်ဗိမာန်တော်သို့သွားရာကြွေးကြော်ခြင်း၊ ထောမနာပြုခြင်းအသံမြွက်ဆိုလျက်၊ ဘုရားဖူးသူလူပရိသတ်ကိုငါဦးဆောင်ခဲ့ရကြောင်း သတိရ၍၊ ငါ့စိတ်ဝိညာဉ် ကြေကွဲလျက်ရှိ၏။ 5 အိုငါ့စိတ်ဝိညာဉ်၊ အဘယ့်ကြောင့်ညှိုးငယ်ရသနည်း။ အတွင်း၌အဘယ့်ကြောင့် မငြိမ်မဝပ်ရှိရသနည်း။ ဘုရားသခင်ကိုမေျှာ်လင့်လော့။ ငါ့အားမျက်နှာသာပေးတော်မူ သောအရှင်ကို၊ ငါချီးမွမ်းခွင့်ရဦးမည်။

6 အိုအကျွန်ုပ်ဘုရားသခင်၊ စိတ်ဝိညာဉ်သည်၊ အတွင်း၌ညှိုးငယ်လျက်ရှိပါ၏။ သို့ဖြစ်၍ယော်ဒန်မြစ်ဖြာရာ၊ ဟေရမုန်တောင်တန်းနှင့်မိဇရကုန်းမှ၊ ကိုယ်တော်ကိုအကျွန်ုပ် သတိရပါ၏။ 7 ရေကျတော်များဟုန်းသံဖြင့်၊ ချောက်အချင်းချင်းခေါ်တုံ့ခေါ်ရာ၊ လှိုင်းတံပိုးတော်ရှိသမျှသည်၊ အကျွန်ုပ်ကိုလွှမ်းမိုးပါပြီ။ 8 နေ့အခါတွင်၊ မေတ္တာကျေးဇူးတော်ကိုထာဝရဘုရားသနားတော်မူသည့်အလျောက်၊ ညဉ့်အခါတွင်၊ ကိုယ့်အသက်သခင့်ထံပဌနာပြုလျက်၊ ဂုဏ်တော်သီဆိုခွင့်ကိုရဦး မည်။ 9 အကျွန်ုပ်ကိုအဘယ့်ကြောင့်မေ့တော်မူပါသနည်း။ ရန်သူနှိပ်စက်ခံရ၍၊ မှိုင်ကာမှိုင်ကာ၊ အဘယ့်ကြောင့်သွားလာရပါသနည်းဟု ငါ့ကျောက်တောင်သဖွယ်ဖြစ်တော်မူသော ဘုရားသခင့်ထံလျှောက်ထားမည်။ 10 ငါ့ရန်သူတို့က၊ သင့်ဘုရားကား၊ အဘယ်မှာနည်းဟု နေ့ရှိသမျှလှောင်ပြောင်လျက်၊ ငါ့အရိုးကိုချိုးဘိသကဲ့သို့ကဲ့ရဲ့တတ်ကြ၏။ 11 အိုငါ့စိတ်ဝိညာဉ်၊ အဘယ့်ကြောင့်ညှိုးငယ်ရသနည်း။ အတွင်း၌အဘယ့်ကြောင့်မငြိမ်မဝပ်ရှိရသနည်း။ ဘုရားသခင်ကိုမေျှာ်လင့်လော့။ ငါ့အားမျက်နှာသာပေးတော်မူသော ငါ့ဘုရားသခင်ကိုချီးမွမ်းရဦးမည်။