1 အိုထာဝရဘုရား၊ အကျွန်ုပ်၏ပဌနာကိုကြားနာ၍၊ အသနားတော်ခံချက်များကိုနားညောင်းတော်မူပါ။ သစ္စာတော်နှင့် ဖြောင့်မတ်ခြင်းအလျောက်၊ ထူးတော်မူပါ။ 2 ရှေ့တော်၌မည်သူမျှ မဖြောင့်မတ်သည့်အလျောက်၊ ကျွန်တော်မျိုးနှင့်တရားဆိုင်တော်မမူပါနှင့်။ 3 ရန်သူသည်အကျွန်ုပ်အသက်ကိုလိုက်လံလျက်၊ ဇီဝကိုမြေတိုင်အောင်နှိပ်နင်းလျက်၊ ကာလအစဉ်သူသေတို့ဘာဝ၊ မှောင်မိုက်ရာတွင်အိပ်ဝပ်စေပါ၏။ 4 ထို့ကြောင့်၊ အကျွန်ုပ်သည် စိတ်ပျက်လျက်၊ အတွင်းနှလုံးထိတ်လန့်လျက်ရှိပါ၏။ 5 ရှေးကာလနေ့ရက်များကိုသတိရ၍၊ ပြုတော်မူသမျှကိုဆင်ခြင်ခြင်း၊ လက်တော်နှင့်စီရင်သောအရာများကို စဉ်းစားခြင်း၊ 6 ကိုယ်တော့်ထံလက်အုပ်ချီခြင်းပြုလျက်၊ သွေ့ခြောက်သောမြေကဲ့သို့စိတ်တသပါ၏။ 7 အိုထာဝရဘုရား၊ အလျင်အမြန်ထူးတော်မူပါ။ စိတ်ပျက်လှပါပြီ။ သင်္ချိုင်းတွင်းထဲသို့ဆင်းသောသူကဲ့သို့မဖြစ်စေရန်၊ မျက်နှာလွှဲတော်မမူပါနှင့်။ 8 ကိုယ်တော်၌အကျွန်ုပ်ကိုးစားသောကြောင့်၊ မေတ္တာကျေးဇူးတော်သံကိုနံနက်ယံ၌ကြားနာခွင့်၊ ကိုယ်တော်အားစွဲလမ်းသောကြောင့်၊ သွားရာလမ်းကိုသိမြင်ခွင့်ပေးတော်မူပါ။ 9 အိုထာဝရဘုရား၊ ကိုယ်တော်၌ပုန်းအောင်းသောအကျွန်ုပ်ကိုကယ်လွှတ်တော်မူပါ။ 10 အကျွန်ုပ်၏ဘုရားဖြစ်တော်မူသောကြောင့်၊ အလိုတော်ကိုဆောင်ရွက်ရစေရန် သွန်သင်တော်မူပါ။ ကောင်းမြတ်သောဝိညာဉ်တော်သည်၊ ပြန့်ပျူးသောပြည်၌လမ်းပြတော်မူပါ။ 11 အိုထာဝရဘုရား၊ နာမတော်အတွက်အသက်ရှင်စေလျက်၊ ဖြောင့်မတ်တော်မူခြင်းအလျောက်၊ အကျွန်ုပ်ကိုဒုက္ခထဲမှထုတ်ဆောင်တော်မူပါ။ 12 မေတ္တာကျေးဇူးတော်အလျောက်၊ အကျွန်ုပ်ရန်သူတို့ကိုပယ်ရှား၍ကိုယ်တော်၏ကျွန်ဖြစ်သောကြောင့်၊ အကျွန်ုပ်အသက်ညှဉ်းပန်းသူရှိသမျှကိုဖျက်ဆီးတော်မူပါ။