1 ထိုနောက် ယောသပ်သားတို့၏အဆက်အနွယ်များအနက် မနာရှေ့မြေး၊ မာခိရသား၊ ဓိလဒ်အဆက်အနွယ်တွင် အိမ်ထောင်များအအုပ်အချုပ်တို့သည် မောရှေမှစ၍ ဣသရေလအိမ်ထောင်များအအုပ်အချုပ်ဖြစ်သူ အကြီးအကဲတို့ထံချဉ်းကပ်လျက်၊ 2 ထာဝရဘုရားသည် ဣသရေလအမျိုးသားတို့အား ပြည်နယ်ကိုအပိုင်အဖြစ် မဲချ၍ပေးဝေစေခြင်းငှါ အရှင်ဘုရားအား မိန့်မှာတော်မူခဲ့ပါပြီ။ အရှင်ဘုရားလည်း ကျွန်တော်တို့၏ဆွေမျိုးသားချင်းဖြစ်သူ ဇလောဖဒ်၏ပိုင်စုကို သူ့သမီးတို့အားပေးရန် အမိန့်တော်ကိုခံပါပြီ။ 3 ထိုသမီးတို့သည် ဣသရေလအမျိုးသားတို့အနက် အခြားအနွယ်သားတို့နှင့်အိမ်ထောင်ဘက်ပြုလျှင်၊ ၎င်းတို့အမွေစုကို ကျွန်တော်တို့ဘိုးဘေးများ ပိုင်စုမှနုတ်ယူလျက် ဝင်သွားမည့်အနွယ်၏ ပိုင်စုတွင်ထပ်ဆင့်စေသဖြင့်၊ 4 ကျွန်တော်တို့ပိုင်ရာဝေစု လျော့ပါလိမ့်မည်။ ဣသရေလအမျိုးသားတို့ မင်္ဂလာနှစ်တိုင်သော်၊ ၎င်းတို့အမွေစုကို ဝင်သွားမည့်အနွယ်ပိုင်စုတွင် ထပ်ဆင့်စေသည့်အတိုင်း ကျွန်တော်တို့ဘိုးဘေးများအနွယ်၏ ပိုင်စုလျော့မြဲလျော့လိမ့်မည်ဟု တောင်းလျှောက်ကြရာ၊ 5 ထာဝရဘုရားအမိန့်တော်အတိုင်း ဣသရေလအမျိုးသားတို့အား မောရှေက၊ ယောသပ်အနွယ်သားတို့တောင်းလျှောက်သည်မှာ သင့်လျော်၏။ 6 ဇလောဖဒ်၏သမီးတို့ကိုရည်လျက် ထာဝရဘုရားမိန့်မှာတော်မူချက်ကား သူတို့အဘ၏အနွယ်ချင်းသား၊ နှစ်သက်သူနှင့် အိမ်ထောင်ဘက်ပြုစေ။ 7 သို့နှင့်အညီ တစ်နွယ်မှတစ်နွယ်သို့ ဣသရေလအမျိုးသားတို့ပိုင်စု မလွှဲမပြောင်းရ။ အသီးအသီးတို့သည် ဘိုးဘေးတို့အနွယ်ပိုင်စုကို လက်မလွှတ်ကြရာ၊ 8 ဣသရေလအနွယ်တစ်နွယ်နွယ်၌ အမွေစုကိုဆက်ခံသော သမီးတိုင်းလည်း ဘိုးဘေးတို့ပိုင်စုကို ဣသရေလအမျိုးသားအသီးအသီးတို့ ပိုင်မြဲပိုင်စေခြင်းငှါ ကိုယ့်အနွယ်ချင်းနှင့်သာ အိမ်ထောင်ဘက်ပြုစေ။ 9 သို့နှင့်အညီ တစ်နွယ်မှတစ်နွယ်သို့ ပိုင်စုမလွှဲမပြောင်းရ။ ဣသရေလအနွယ်အသီးအသီးတို့သည် ကိုယ့်ပိုင်စုကိုလက်မလွှတ်ကြရကြောင်း မိန့်တော်မူသည်ဟု ဆင့်ဆိုလေ၏။ 10-12 မောရှေအား ထာဝရဘုရားမိန့်မှာတော်မူသည့်အတိုင်း ဇလောဖဒ်၏သမီးမာလာ၊ တိရဇာ၊ ဟောဂလာ၊ မိလခါ၊ နောအာတို့သည်လိုက်နာ၍ ယောသပ်သားမနာရှေ၏အဆက်အနွယ်ဖြစ်သူ ဘကြီးဘထွေးတို့သားများနှင့် အိမ်ထောင်ဘက်ပြုကြသည်နှင့် ၎င်းတို့အမွေစုသည် အဘ၏အဆက်အနွယ်တွင် တည်မြဲတည်၏။

13 ယေရိခေါမြို့တစ်ဘက်၊ ယော်ဒန်မြစ်အနီး၊ မောဘလွင်ပြင်၌ ဣသရေလအမျိုးသားတို့အား မောရှေဖြင့် ထာဝရဘုရားမိန့်မှာတော်မူသော စီရင်ဆုံးဖြတ်ချက်များကား ထိုသို့တည်း။