1 ဣသရေလလူမျိုးတို့သည် ရှိတ္တိမ်မြို့၌ စွဲရပ်သည့်ကာလ၊ 2 မောဘအမျိုးသမီးတို့နှင့်မှားယွင်း၍ ၎င်းတို့ဘုရားပူဇော်ပွဲသို့ အဖိတ်ခံရသည့်အလျောက် စားသောက်လျက်ထိုဘုရားကိုရှိခိုးကြ၏။ 3 ထိုသို့ ဗာလပေဂုရနတ်ကိုမှီဝဲကြသောကြောင့် ထာဝရဘုရားသည် ဣသရေလလူမျိုးအား အမျက်တော်ထားလျက်၊ 4 အမျက်တော်အရှိန်ကို ဣသရေလလူမျိုးမှလွှဲစေရန် လူမျိုးတော်အအုပ်အချုပ်ရှိသမျှကိုခေါ်ပြီးလျှင် ငါထာဝရဘုရားရှေ့နေအလင်း၌ ကားတင်စေဟု မောရှေအားမိန့်တော်မူသည့်အတိုင်း၊ 5 မောရှေက၊ သင်တို့အသီးအသီးအုပ်စုအနက် ဗာလပေဂုရနတ်၌မှီဝဲသူတို့ကို ကွပ်မျက်ကြလော့ဟု ဣသရေလတရားပိုင်မင်းတို့အား ဆင့်ဆိုလေ၏။

6 ထိုအခါ ဣသရေလအမျိုးသားတစ်ယောက်သည် တွေ့ဆုံရာတဲတော်မုတ်ဝအနီး ငိုကြွေးလျက်နေသော ဣသရေလအမျိုးသားအပေါင်းပရိသတ်နှင့် မောရှေ့မျက်မှောက်တွင်ပင် မိဒျန်အမျိုးမိန်းမကို ဆွေမျိုးသားချင်းတို့ထံ ခေါ်ဆောင်ခဲ့ရာ၊ 7 ပရောဟိတ်အာရုန်မြေး၊ ဧလာဇာ့သားဖိနဟတ်သည်မြင်၍ လှံကိုင်လျက်လူပရိသတ်အလယ်မှထပြီးလျှင်၊ 8 တဲအတွင်းသို့ သူ့ကိုလိုက်လံထိုးသတ်ရာ မိန်းမဝမ်းပါဖောက်သဖြင့် ဣသရေလအမျိုးသားတို့တွင် ကပ်ရောဂါငြိမ်းလေ၏။ 9 ထိုကပ်ရောဂါနှင့်သေသောလူပေါင်းကား နှစ်သောင်းလေးထောင်တည်း။ 10-11 ထိုနောက်မောရှေအား ထာဝရဘုရားက ပရောဟိတ်အာရုန့်မြေး၊ ဧလာဇာ့သားဖိနဟတ်သည် ဣသရေလအမျိုးသားတို့အတွက် ငါမရှုဆိတ်သည့်နည်းတူ မရှုဆိတ်သဖြင့် ဣသရေလအမျိုးသားတို့ကို ငါမရှုဆိတ်သောသဘောနှင့် မကုန်ခန်းစေခြင်းငှါ အမျက်တော်ကိုလှဲလေပြီ။ 12-13 သို့နှင့်အညီ ကိုယ့်ဘုရားသခင်အတွက် မရှုစိတ်လျက် ဣသရေလအမျိုးသားတို့အပြစ်အဖို့ ဖြေခြင်းကိုပြုသောကြောင့် ထိုသူနှင့်သားစဉ်မြေးဆက်တို့အား ပရောဟိတ်ရာထူးဆိုင်ရာမဟာမိတ်ပဋိညာဉ်ကို ငါအမြဲဖွဲ့ကြောင်းဆင့်ဆိုလော့ဟု မိန့်တော်မူ၏။ 14 မိဒျန်အမျိုးမိန်းမနှင့်တကွ သေဒဏ်ခံသောဣသရေလလူ၏အမည်ကား၊ ရှိမောင့်အနွယ်တွင် တစ်အိမ်ထောင်အကြီးအကဲ၊ သာလုသားဇိမရိတည်း။ 15 သေဒဏ်ခံသောမိဒျန်အမျိုးမိန်းမအမည်ကား၊ မိဒျန်အမျိုးတွင် တစ်အိမ်ထောင်သားတို့အအုပ်အချုပ်၊ ဇုရသမီးကောဇဘိတည်း။ 16-18 တစ်ဖန်မောရှေအား ထာဝရဘုရားက၊ မိဒျန်လူမျိုးသည် ပေဂုရနတ်အမှုအရေး၌လည်းကောင်း၊ ပေဂုရအမှုအရေးကြောင့် ကပ်ရောဂါသင့်သောနေ့တွင် အမျိုးသားချင်းဖြစ်သူ၊ သေဒဏ်ခံရသောမိဒျန်အကြီးအကဲ၏သမီး ကောဇဘိအမှုအရေး၌လည်းကောင်း လှည့်စား၍ရန်မူသည့်အတွက် ရန်တုံ့ပြန်လျက်လုပ်ကြံလော့ဟု မိန့်တော်မူ၏။