1 နွားအုပ်မှ မိတ်သဟာယပူဇော်သက္ကာကို တင်သွင်းလှူဒါန်းလျှင် ကြန်အင်စုံသော အထီးအမတစ်ကောင်ကောင်ကို ထာဝရဘုရားရှေ့တင်သွင်းစေ။ 2 လှူဒါန်းသောနွားဦးခေါင်းပေါ်တွင်လက်တင်၍ တွေ့ဆုံရာတဲတော်မုတ်ဝအနီး စီရင်ပြီးလျှင်၊ အာရုန့်သားပရောဟိတ်ဖြစ်သူတို့သည် ပူဇော်ရာပလ္လင်တော်ဘေးပတ်လည်၌ အသွေးကိုသွန်းပက်ကြရမည်။ 3-4 မိတ်သဟာယသက္ကာအနက် ဝမ်းတွင်း၌ဖုံးလွှမ်းသောဆီဥ၊ အုပ်ရစ်သောဆီဥရှိသမျှ ကျောက်ကပ်တစ်စုံနှင့် ခါးစောင်းရှိဆီဥ၊ ကျောက်ကပ်အနီးမှခွာရသော အသည်းဆိုင်ရာအညှို့များကို ထာဝရဘုရားထံမီးပူဇော်ရာအဖြစ် ဆက်ကပ်ပြီးမှ၊ 5 အာရုန့်သားတို့သည် ထာဝရဘုရားစိတ်တော်ပြေဖွယ်ရနံ့အဖြစ် မီးပူဇော်ရာအဖြစ်ဖြင့် ပလ္လင်တော်ရှိထင်းမီးအထက် မီးရှို့ရာသက္ကာအပေါ်တွင် ပူဇော်ကြရမည်။

6 သိုးဆိတ်အုပ်မှထာဝရဘုရားထံ မိတ်သဟာယပူဇော်သက္ကာကိုဆက်ကပ်လျှင် ကြန်အင်စုံသော အထီးအမတစ်ကောင်ကောင်ကို လှူဒါန်းစေ။ 7 သိုးသားငယ်ကိုလှူဒါန်းလျှင် ထာဝရဘုရားရှေ့တင်သွင်းရာ၊ 8 လှူဒါန်းသောသိုးသားငယ်ဦးခေါင်းပေါ်တွင်လက်တင်၍ တွေ့ဆုံရာတဲတော်ရှေ့စီရင်ပြီးလျှင် အာရုန့်သားတို့သည် ပလ္လင်တော်ဘေးပတ်လည်၌ အသွေးကိုသွန်းပက်ကြရမည်။ 9 မိတ်သဟာယသက္ကာအနက် ဆီဥ၊ ခါးဆက်မှခွာရသောမြီးထူး၊ ဝမ်းတွင်း၌ဖုံးလွှမ်းသောဆီဥ၊ အုပ်ရစ်သောဆီဥရှိသမျှ ကျောက်ကပ်တစ်စုံနှင့် ခါးစောင်းရှိဆီဥ၊ ကျောက်ကပ်အနီးမှခွာရသော အသည်းဆိုင်ရာ အညို့များကို၊ 10 ထာဝရဘုရားထံမီးပူဇော်ရာအဖြစ် ဆက်ကပ်ပြီးမှ၊ 11 ပရောဟိတ်သည် ထာဝရဘုရားထံ မီးပူဇော်ရာအစာအာဟာရအဖြစ်ဖြင့် ပလ္လင်တော်ပေါ်မှာပူဇော်ရမည်။

12 ဆိတ်ကိုလှူဒါန်းလျှင် ထာဝရဘုရားရှေ့တင်သွင်းရာ ဦးခေါင်းပေါ်တွင်လက်တင်၍ 13 တွေ့ဆုံရာတဲတော်ရှေ့စီရင်ပြီးလျှင် အာရုန့်သားတို့သည် ပလ္လင်တော်ဘေးပတ်လည်၌ အသွေးကိုသွန်းပက်ကြရမည်။ 14-15 အလှူဒါနအနက် ဝမ်းတွင်း၌ဖုံးလွှမ်းသောဆီဥ၊ အုပ်ရစ်သောဆီဥရှိသမျှ ကျောက်ကပ်တစ်စုံနှင့်ခါးစောင်းရှိဆီဥ၊ ကျောက်ကပ်အနီးမှခွာရသော အသည်းဆိုင်ရာအညှို့များကို ထာဝရဘုရားထံမီးကပူဇော်ရာအဖြစ်ဆက်ကပ်ပြီးမှ၊ 16 ဆီဥရှိသမျှ ထာဝရဘုရားပိုင်ရာတော်ဖြစ်သည်နှင့်အညီ ပရောဟိတ်သည် စိတ်တော်ပြေဖွယ်ရနံ့၊ မီးပူဇော်ရာအစာအာဟာရအဖြစ်ဖြင့် ပလ္လင်တော်ပေါ်မှာပူဇော်ရမည်။ 17 သင်တို့အမျိုးအစဉ်အဆက် နေရာအရပ်ရပ်၌ ဆီဥနှင့်အသွေးကိုမသုံးဆောင်ရဟူ၍ အမြဲအထုံးအဖွဲ့ဖြစ်ရမည်ဟု မိန့်တော်မူ၏။