1-2 ဗာဗုလုန်ဘုရင် နေဗုခဒ်နေဇာမင်းသည်၊ ငါတို့အားစစ်တိုက်ရေးနှင့်စပ်လျဉ်း၍၊ ထာဝရဘုရားထံငါတို့အဖို့မေးလျှောက်ပါ။ ထိုမင်းဆုတ်ခွာစေအံ့သောငှာ၊ အံ့ဖွယ်ရာ ရာတော်အလိုက်၊ ငါတို့ဘက်၌ ထာဝရဘုရားစီရင်ကောင်းစီရင်တော်မူလိမ့်မည်ဟု ကြားလျှောက်စေရန်၊ မေလခိသားပါရှုရနှင့်ပရောဟိတ်မာသေယသား ဇေဖနိတို့ကို၊ ဇေဒကိမင်းစေလွှတ်သည့်ကာလ၊ ယေရမိသို့ရောက်လာသော၊ ထာဝရဘုရား၏ဗျာဒိတ်တော်ကိုဆိုဦးအံ့။ 3-4 ထိုသူတို့အား ယေရမိက၊ ဇေဒကိမင်းထံပြန်ကြားရမည့်၊ ဣသရေလလူမျိုး၏ဘုရားသခင်၊ ထာဝရဘုရား၏ဗျာဒိတ်တော်ကား၊ ဝန်းဝိုင်းလျက်ရှိသော၊ ဗာဗုလုန်ဘုရင်နှင့် ခါလဒဲတပ်သားတို့တစ်ဘက်၊ မြို့ရိုးအပြင်တွင်၊ သင်တို့စွဲကိုင်တိုက်ခိုက်သော လက်နက်ဓားသွားကို၊ ငါလှည့်၍ မြို့တွင်းသို့ဆုတ်ဝင်စေမည့်ပြင်၊ 5 ဒေါသအရှိန်နှင့် မဟာအမျက်တော်ထားလျက်၊ အားကြီးသောလက်ရုံးတော်ကိုဆန့်တန်း၍၊ ငါကိုယ်တိုင်စစ်တိုက်မည့်အလျောက်၊ 6 ဒဏ်ခတ်တော်မူသော ရောဂန္တရကပ်ကြောင့်၊ ဤမြို့နေလူသူတိရစ္ဆာန်တို့သည် သေရကြလတ္တံ့။ 7 ထို့နောက်၊ ငါထာဝရဘုရားမိန့်ဆိုသည့်အတိုင်း၊ ရောဂန္တရကပ်၊ သတ္တန္တရကပ်၊ ဒုမ္ဘိက္ခန္တရကပ်များမှ ကျန်ရစ်သော မြို့သူမြို့သားတို့နှင့်တကွ ယုဒဘုရင်ဇေဒကိမင်းကို၊ ကျေးကျွန်သင်းပင်းတို့ပါ၊ ဗာဗုလုန်ဘုရင်နေဗုခဒ်နေဇာမင်းမှစသော၊ အသက်အန္တရာယ်ရှာကြံသူရန်ဘက်တို့လက်တွင်းသို့၊ ငါအပ်နှင်းသည့်အလျောက်၊ ထိုမင်းသည် စာနာခြင်း၊ ညှာတာခြင်း၊ သနားခြင်းကင်းလျက်၊ ဓားဖြင့်လုပ်ကြံလိမ့်မည်ဟူ၍တည်း။ 8 ဤလူမျိုးအားလည်း၊ ပြန်ကြားရမည့် ထာဝရဘုရား၏ဗျာဒိတ်တော်ကား၊ ရှင်ခြင်းလမ်းကိုလည်း‌ေကာင်း၊ သေခြင်းလမ်းကိုလည်း‌ေကာင်း၊ သင်တို့ရှေ့ငါထားသည့်အလျောက်၊ 9 ဤမြို့အတွင်းတွင်နေသေးသောသူသည် သတ္တန္တရကပ်၊ ဒုဗ္ဘိက္ခန္တရကပ်၊ ရောဂန္တရကပ်များကြောင့်၊ သေရမည်။ ဝန်းဝိုင်းသောခါလဒဲတပ်သားတို့ဘက်သို့ထွက်သွား ကူးဝင်သူမှာမူ၊ အသက်ဆုကိုရ၍ရှင်လတ္တံ့။ 10 ငါထာဝရဘုရားမိန့်ဆိုသည့်အတိုင်း၊ အကောင်းကိုမဟုတ်၊ အဆိုးကိုပြုရန်သာ၊ ဤမြို့အပေါ်တွင် မျက်နှာတော်ထားသည့်အလျောက်၊ မီးတိုက်မည့် ဗာဗုလုန်ဘုရင်၏လက်တွင်းသို့အပ်နှင်းမည်ဟူ၍တည်း။

11-12 ယုဒမင်းဆွေ၊ မင်းမျိုးအားလည်းပြန်ကြားရမည်မှာ၊ အိုဒါဝိဒ်မင်းမျိုး၊ ထာဝရဘုရား၏ဗျာဒိတ်တော်ကိုနာခံလော့။ သင်တို့ဆိုးသွမ်းသောအပြုအကျင့်များအတွက်၊ အမျက်တော်မငြိမ်းနိုင်သည့်တိုင်အောင်၊ မီးသဖွယ်ပေါက်ထွက်တောက်လောင်မည်စိုး၍၊ နံနက်အချိန်၌ တရားသဖြင့်စီရင်လျက်၊ ညှဉ်းပန်းသူ၏လက်တွင်းမှအလုအယက်ခံရသူ့ကို ကယ်လွှတ်ကြရမည်ဟူသော၊ ထာဝရဘုရား၏ အမိန့်တော်ကိုပြန်ကြားလော့။

13 ငါတို့ရှိရာသို့ဆင်းချီ၍၊ ခိုလှုံရာအရပ်များသို့ဝင်ဝံ့သူကား၊ မည်သူနည်းဟုဝါကြွားသူ၊ ချိုင့်တွင်လည်း‌ေကာင်း၊ ခင်တန်းရှိကျောက်တောင်ပေါ်တွင်လည်း‌ေကာင်း၊ နေထိုင်သူ၊ 14 ငါသည်သင့်တစ်ဘက်၌နေလျက်၊ အပြုအမူ၏အကျိုးဆက်အလျောက်အစီအရင်လာ၍၊ ပတ်လည်ရှိသမျှကျွမ်းလောင်ရန်မီးကို၊ သစ်တောတွင်မွေးမည်ဟုထာဝရဘုရား မိန့်တော်မူကြောင်း၊ ယေရမိပြန်ဆိုလေ၏။