1 ထာဝရဘုရားမိန့်တော်မူသည်မှာ၊ ကယ်တင်တော်မူခြင်းရောက်ချိန်၊ အောင်မြင်တော်မူခြင်း ထင်ရှားချိန်တိုင်လုပြီးဖြစ်၍၊ တရားစောင့်လျက်ဖြောင့်မတ်စွာပြုကျင့်ကြလော့။ 2 ဥပုသ်နေ့ကိုမဖျက်ဘဲစောင့်ခြင်း၊ ဒုစရိုက်မပြုမိစေရန် လက်ကိုချုပ်တည်းခြင်းပြုကျင့်သောသူ၊ စွဲမြဲသော လူ့သားသည် မင်္ဂလာရှိ၏။ 3 ငါထာဝရဘုရားကိုမှီဝဲသောလူမျိုးခြားကား၊ ထာဝရဘုရားသည် ငါ့ကို လူမျိုးတော်နှင့်ခွဲခြားစေလိမ့်မည်ဟူ၍လည်း‌ေကာင်း၊ မိန်းမစိုးကလည်း၊ ငါသည် သွေ့ခြောက်သောအပင် ဖြစ်သည်ဟူ၍လည်း‌ေကာင်း မဆိုရ။ 4 ငါ၏ဥပုသ်နေ့ကိုစောင့်လျက်၊ နှစ်သက်တော်မူရာများကို ရွေးချယ်၍၊ ပဋိညာဉ်တော်ကိုစွဲမြဲသော မိန်းမစိုးတို့နှင့်စပ်လျဉ်း၍ ငါထာဝရဘုရားဗျာဒိတ်တော်ရှိသည်မှာ၊ သားသမီးထက်မြတ်သောသညာကမ္ဗည်းကို၊ 5 ငါ့ဗိမာန်၊ ငါ့တံတိုင်းအတွင်းတွင်၊ ထိုသူတို့အားပေး၍၊ မပြတ်မစဲနိုင်သောနိယမအမည်ဖြင့် မှည့်လိမ့်မည်။ 6 ငါထာဝရဘုရား၏ကျွန်အဖြစ်ဖြင့်၊ နာမတော်ကိုကြည်ညိုလျက်၊ အမှုတော်ကို ဆောင်ရွက်ခွင့်ရစေရန်၊ ငါ၌မှီဝဲ၍၊ ဥပုသ်နေ့ကိုမဖျက်ဘဲစောင့်လျက်၊ ပဋိညာဉ်တော်ကို စွဲမြဲသောလူမျိုးခြားရှိသမျှတို့ကိုလည်း၊ 7 သန့်ရှင်းသောငါ့တောင်တော်သို့ ခေါ်ဆောင်သည့်ပြင်၊ ငါ့ဗိမာန်တော်ကို လူအမျိုးမျိုးတို့ဆုတောင်းပဌနာပြုရာဗိမာန်ဟုသမုတ်အံ့သည်နှင့်အညီ၊ ထိုဗိမာန်တော်တွင် ရွှင်လန်းခွင့်ပေးလျက်၊ သူတို့မီးရှို့ရာသက္ကာမှစ၍ ယဇ်အမျိုးမျိုးကို၊ ငါ့ပလ္လင်တော်ပေါ်တွင် လက်ခံလိမ့်မည်။ 8 နှင်ထုတ်ခံရသောဣသရေလအမျိုးသားတို့ကိုစုရုံးသောအခါ၊ စုရုံးပြီးလူမျိုးတော်ပြင်၊ အခြားလူတို့ပါ၊ စုရုံးဦးမည်ဟူ၍၊ ငါအရှင်ထာဝရဘုရားဗျာဒိတ်ရှိသည်ဟုမိန့်တော်မူ၏။

9 တောပိတ်ပေါင်းရှိသားရဲမှစ၍ သစ်တောသားရဲအပေါင်းတို့၊ မျိုစားရန်ဝင်လာကြလော့။ 10 မြို့စောင့်ရှိသမျှတို့သည် မျက်စိကွယ်၍၊ အသိပညာကင်းကြ၏။ ရှိသမျှတို့သည် အအိပ်ခုံမင်သဖြင့်၊ ဝပ်လျားယောင်ယမ်းလျက်၊ အ၍မဟောင်တတ်သောခွေးများဖြစ်ကြ၏။ 11 အစားကြူး၍ တင်းမတိမ်နိုင်သောခွေးများဖြစ်သည်နှင့် ဉာဏ်ကင်းသောသိုးကျောင်းများပါတကား။ ရှိသမျှသောအသီးအသီးတို့သည်၊ ကိုယ့်ကျိုးကိုရှာ၍၊ ကိုယ့်လမ်းသို့ လွဲသွားကြ၏။ 12 သူတို့က၊ လာကြ၊ စပျစ်ရည်ကိုငါယူခဲ့မည်။ သေရည်သေရက်ကိုသောက်ကြူးကြစို့။ နက်ဖြန်နေ့လည်းယနေ့ကဲ့သို့မနှိုင်းယှဉ်နိုင်သောပွဲနေ့ကြီးဖြစ်လိမ့်မည်ဟုဆိုတတ်ကြ၏။