52
1 အိုဇိအုန်မြို့၊ နိုးထလော့။ နိုးထ၍သင့်ခွန်အားကိုဆင်ယင်လော့။ သန့်ရှင်းသောအိုယေရုရှလင်မြို့၊ လှီးဖြတ်ခြင်းမင်္ဂလာကိုမခံခဲ့သူ၊ သန့်ရာမရောက်သူတို့သည်၊ သင့်အတွင်းသို့ နောက်တစ်ဖန်ဝင်ခွင့်မရသည်ဖြစ်၍၊ တင့်တယ်သောအဝတ်တန်ဆာကို ဝတ်ဆင်လော့။
2 အိုယေရုရှလင်မြို့၊ မြေမုန့်ကိုခါ၍တက်ပြီးလျှင် စံနေလော့။ အိုသုံ့ပန်းခံရသောသတို့သမီးဇိအုန်၊ သင့်လည်ကြိုးကိုချွတ်လော့။
3 ထာဝရဘုရားက၊ အဖိုးမဲ့ရောင်းချခံရသည့်အလျောက်၊ ကိုယ်နေကျေးကင်းလျက် ရွေးနုတ်ခံရလိမ့်မည်ဟုမိန့်တော်မူ၏။
4 အရှင်ထာဝရဘုရားက၊ လူမျိုးတော်သည်၊ ယမန်အိဂျစ်ပြည်သို့ဝင်နေသူအဖြစ်ရောက်ခဲ့ကြပြီ။ အာရှုရိလူတို့ကလည်း၊ အကြောင်းမဲ့ညှဉ်းပန်းကြသည်ဟုမိန့်တော်မူ၏။
5 ထာဝရဘုရားမိန့်တော်မူပြန်သည်ကား၊ လူမျိုးတော်ကို အကြောင်းမဲ့သိမ်းသွား၍၊ အစိုးရသောသူတို့သည် ကြိမ်းဝါးလျက်၊ နာမတော်ကို နေ့စဉ်မပြတ်ဆဲရေးပုတ်ခတ်ကြသည်ကား၊ နေရာတော်မှာ ငါမည်သို့ပြုဘိသနည်း။
6 သို့ဖြစ်သောကြောင့်၊ လူမျိုးတော်သည် ငါ၏နာမတော်ကိုလည်းေကာင်း၊ ဗျာဒိတ်ပေးသောအရှင်၊ ငါသာလျှင်ဖြစ်ကြောင်းကိုလည်းေကာင်း၊ ထိုကာလသိကြလိမ့်မည်ဟု ထာဝရဘုရားမိန့်တော်မူ၏။
7 ဝမ်းမြောက်ဖွယ်သတင်းကိုကြော်ငြာရသူ၊ ငြိမ်သက်ခြင်းအကြောင်းကိုကြားပြောရသူ၊ ချမ်းသာခြင်းသတင်းကိုကြော်ငြာရသူ၊ ကယ်တင်ခြင်းအကြောင်းကိုကြားပြောရသူ၊ သင်၏ဘုရားသခင်မင်းပြုတော်မူပြီဟု၊ ဇိအုန်မြို့အားဆင့်ဆိုရသူ၏ ခြေသည်၊ တောင်ပေါ်မှာတင့်တယ်စွတကား။
8 မြို့စောင့်တို့သည်အသံလွှင့်၍၊ တစ်ပြိုင်တည်းကြွေးကြော်ကြသည်တကား။ ထာဝရဘုရားသည်ဇိအုန်မြို့သို့ပြန်ကြွတော်မူသည်ကို၊ မျက်မှောက်ထင်ထင်ဖူးမြင်ခွင့်ရကြသတည်း။
9 အချင်းယေရုရှလင်မြို့ဆိုးကုန်းတို့ တစ်ပြိုင်တည်းရွှင်လန်းလျက်ကြွေးကြော်ကြလော့။ ထာဝရဘုရားသည်လူမျိုးတော်ကိုနှစ်သိမ့်စေလျက်၊ ယေရုရှလင်မြို့ကိုရွေးနုတ်တော်မူပြီ။
10 ထာဝရဘုရားသည် သန့်ရှင်းသောလက်ရုံးတော်ကို လူအမျိုးမျိုးတို့ရှေ့ ဖော်ပြတော်မူပြီးဖြစ်၍၊ မြေကြီးအစွန်းအဖျားရှိသမျှပင်၊ ငါတို့ဘုရားသခင်ကယ်တင်တော်မူ ခြင်းကို ဖူးမြင်ရကြလတ္တံ့။
11 ထွက်ကြလော့။ ထွက်ကြလော့။ မသန့်ရာကိုမထိဘဲ၊ ဤမှထွက်သွားကြလော့။ ထာဝရဘုရား၏အသုံးအဆောင်တော်များကိုပင့်ဆောင်ရသောသင်တို့၊ စင်ကြယ်သောအဖြစ်နှင့်ထိုမြို့တွင်းမှထွက်သွားကြလော့။
12 သင်တို့သည်အလန့်တကြားပြေးလျက်မထွက်မသွားရကြ။ ထာဝရဘုရားသည်၊ သင်တို့ရှေ့ကချီကြွ၍၊ ဣသရေလလူမျိုး၏ဘုရားသခင်သည်၊ တပ်မသဖွယ်ဖြစ်တော်မူလိမ့်သတည်း။
13 ကြည့်လော့၊ ငါ့ကျွန်ရင်းသည် ကြံတိုင်းအောင်လျက်၊ မွန်မြတ်ကြီးမြင့်လွန်ကဲလိမ့်မည်။
14 လူတို့အသွင်၊ လူ့သားတို့အဆင်းမရှိသည့်တိုင်အောင် ရုပ်ပျက်သဖြင့်၊ လူအများတို့အံ့အားသင့်ခဲ့ကြသည့်နည်းတူ၊
15 များစွာသောလူမျိုးခြားတို့သည် အံ့ဩကြလိမ့်မည်။ ဘုရင်မင်းတို့လည်း၊ မဖော်ပြဘူးသောအရာကိုသိမြင်လျက်၊ မကြားဘူးသောအရာကိုနားလည်ရကြသောကြောင့်၊ ထိုသူ့အတွက်နှုတ်ပိတ်လျက်နေကြလိမ့်မည်။