5
1 သုံးရက်မြောက်သောနေ့၌ ဧသတာသည်၊ မာလိကတန်ဆာကိုဆင်ယင်ပြီးလျှင်၊ နန်းတော်အတွင်းမြို့ရိုး၊ နန်းဦးရင်ဆိုင်ရပ်နေရာ၊ နန်းဦးမုတ်ဝတူရူရာဇပလ္လင်ထက် စံနေသောဘုရင်မင်းသည်၊
2 မြို့ရိုးတော်အတွင်း ရပ်နေသောမိဖုရားဧသတာကိုမြင်လျှင်၊ မျက်နှာသာပေး၍၊ လက်သုံးတော်ရာဇရွှေလှံတံကိုကမ်းလှမ်းသော်၊ ဧသတာချဉ်းကပ်လျက် လှံတံတော် ဖျားကိုထိလေ၏။
3 ဘုရင်မင်းက၊ မိဖုရားဧသတာ၊ ဘယ်အကြောင်းနည်း။ မည်သည်ကိုလိုသနည်း။ နိုင်ငံတော်တစ်ဝက်တိုင်အောင်ငါပေးမည်ဟုမိန့်ဆိုလျှင်၊
4 ဧသတာက၊ ဘုရင်မင်းသဘောတော်မြတ်ပါမူ၊ ဘုရင်မင်းအဖို့ကျွန်မယင်သော စားသောက်ပွဲသို့၊ ဟာမန်နှင့်တကွ၊ ယနေ့ကြွတော်မူပါဟုလျှောက်သော်၊
5 မိဖုရားတင်လျှောက်သည့်အတိုင်းဝင်ရန်၊ အလျင်အမြန်ဟာမန်လာစေဟု ဘုရင်မင်းမိန့်ဆိုပြီးမှ၊ မိဖုရားယင်သောစားသောက်ပွဲသို့၊ ဟာမန်နှင့်အတူကြွဝင်လေ၏။
6 စပျစ်ရည်ပွဲတော်သုံးစဉ် ဘုရင်မင်းက၊ မည်သို့တောင်းလျှောက်လိုသနည်း။ ငါပေးမည်။ မည်သည်ကိုလိုသနည်း။ နိုင်ငံတော်တစ်ဝက်တိုင်အောင်ငါပေးမည်ဟု၊ ဧသတာ အားမိန့်ဆိုလျှင်၊
7 ကျွန်မတောင်းလျှောက်လိုသည်ကား၊
8 အထံတော်၌မျက်နှာသာရ၍၊ ကျွန်မတောင်းလျှောက်မည့်အလိုဆန္ဒကိုသဘောတော်မြတ်ပါမူ၊ နက်ဖြန်ကျွန်မယင်မည့်စားသောက်ပွဲသို့၊ ဟာမန်နှင့်အတူ ကြွတော်မူ ပါဦး။ အမိန့်တော်မြတ်ရင်းအတိုင်း၊ ကျွန်မအသနားတော်ခံပါမည်ဟုတင်လျှောက်လေ၏။
9 ဟာမန်သည်၊ ထိုနေ့ဝမ်းမြောက်ရွှင်လန်းစွာထွက်သွားရာ၊ နန်းတော်တံခါးဝတွင်၊ တုန်လှုပ်ခြင်းကင်းလျက်၊ မထဘဲနေမြဲနေသောမော်ဒကဲကိုမြင်သဖြင့်၊
10 ဒေါသထွက်သော်လည်း၊ ချုပ်တည်းလျက်အိမ်သို့သွား၍ မယားဇေရက်နှင့်အဆွေခင်ပွန်းတို့ကိုခေါ်ပြီးလျှင်၊ ကိုယ့်စည်းစိမ်ကြီးမြတ်ကြောင်းကိုလည်းေကာင်း၊
11 သားသမီးများပြားကြောင်းကိုလည်းေကာင်း၊ ဘုရင်မင်းသူကောင်းပြုတော်မူကြောင်းနှင့်၊ မှူးတော်မတ်တော်ကျေးကျွန်သင်းပင်းတို့ထက် နေရာထူးပေးတော်မူကြောင်းကိုလည်းေကာင်း ဖော်ပြပြီးနောက်၊
12 မိဖုရားဧသတာလည်း၊ ယင်တော်မူသောစားသောက်ပွဲသို့၊ ငါမှတစ်ပါးမည်သူ့ကိုမျှ ဘုရင်မင်းနှင့်အတူဝင်ခွင့်မပေး။ နက်ဖြန်နေ့ပင် ဘုရင်မင်းနှင့်အတူငါ့ကိုခေါ်ဖိတ် တော်မူသေး၏။
13 သို့ရာတွင်၊ နန်းတော်တံခါးဝ၌၊ ယုဒလူမျိုးမော်ဒကဲနေထိုင်ခွင့်ရသမျှကာလပတ်လုံး၊ ဖော်ပြခဲ့သည့်အရာမလောက်သေးပါဟုဆိုရာ၊
14 မယားဇေရက်နှင့်အဆွေခင်ပွန်းအပေါင်းတို့က၊ တောင်ရေငါးဆယ်မြင့်သော လည်ဆွဲတိုင်စိုက်ပါစေ။ ထိုတိုင်၌မော်ဒကဲကိုဆွဲထားစေရန်နက်ဖြန်သံတော်ဦးတင်လော့။ ထို့နောက်၊ ဘုရင်မင်းနှင့်အတူ၊ စားသောက်ပွဲသို့၊ ရွှင်လန်းစွာဝင်ခွင့်ရလိမ့်မည်ဟူသောအကြံကို၊ ဟာမန်နှစ်သက်သဖြင့်၊ လည်ဆွဲတိုင်စိုက်စေ၏။