1 ထို့နောက်၊ ဣသရေလလူကြီး အချို့တို့သည်၊ ငါ့ထံလာ၍ထိုင်နေကြစဉ်၊ 2 ငါသို့ရောက်လာသော ထာဝရဘုရား၏ ဗျာဒိတ်တော်ကား၊ အချင်းလူ့သား၊ ဤသူတို့သည် ကိုယ့်ရုပ်ပွားများကို စိတ်စွဲလမ်း၍၊ 3 ဒုစရိုက်ဆိုင်ရာခလုတ်ကို မျက်မှောက်ပြုလျက်နှင့်၊ ငါ့ထံမေးလျှောက်ခွင့်ရအပ်ကြသလော။ 4 သို့ဖြစ်၍၊ ထိုသူတို့အား ဆင့်ဆိုရမည်မှာ၊ ဣသရေလအမျိုးသားတို့အနက်၊ အကြင်သူသည်၊ ကိုယ့်ရုပ်ပွားများကိုစိတ်စွဲလမ်း၍၊ ဒုစရိုက်ဆိုင်ရာခလုတ်ကိုမျက်မှောက် ပြုလျက်၊ ပရောဖက်ထံချဉ်းကပ်အံ့။ 5 ရုပ်ပွားများကြောင့်၊ ငါနှင့်စိမ်းကားရာရောက်သောဣသရေလတစ်မျိုးလုံးကို၊ စိတ်ပါရာ၌ဖမ်းမိအံ့သောငှာ၊ ရုပ်ပွားအမြောက်အမြားနှင့်ယှဉ်လျက်၊ ထိုသူတို့အားငါထာဝရ ဘုရားတုံ့ပြန်လတ္တံ့ဟု၊ အရှင်ထာဝရဘုရားမိန့်တော်မူကြောင်း၊ ဆင့်ဆိုလော့။ 6 သို့နှင့်အညီ၊ ဣသရေလအမျိုးသားတို့အား ဆင့်ဆိုရဦးမည်မှာ၊ အရှင်ထာဝရဘုရားက ပြန်လာကြလော့။ ကိုယ့်ရွံ့ရှာဖွယ်ရုပ်ပွားဆင်းတုများမှ၊ မျက်နှာလွှဲ၍လှည့်ခဲ့ ကြလော့။ 7 အသို့ဆိုသော်၊ ဣသရေလအမျိုးသားတို့ အနက်ဖြစ်စေ၊ ဝင်နေသူတို့အနက်ဖြစ်စေ၊ အကြင်သူသည်၊ ငါနှင့်စိမ်းကား၍၊ ကိုယ့်ရုပ်ပွားများကိုစိတ်စွဲလမ်းလျက်၊ ဒုစရိုက် ဆိုင်ရာ ခလုတ်ကိုမျက်မှောက်ပြုစဉ်၊ ငါ့အားမေးလျှောက်ရန် ပရောဖက်ထံချဉ်းကပ်အံ့။ 8 ငါထာဝရဘုရားကိုယ်တော်တိုင်မျက်နှာထားလျက်၊ မှတ်သားရာ၊ ပုံခိုင်းရာ၊ အံဖွယ်သရဲဖြစ်စေ၍၊ လူမျိုးတော့်ဘောင်မှပယ်ရှားလျက်၊ ထိုသူ့ကိုတုံ့ပြန်အံ့၊ ထို့ကြောင့်၊ ငါသည် ထာဝရဘုရားဖြစ်ကြောင်း၊ သင်တို့သိရကြလတ္တံ့။ 9 ပရောဖက်လည်း သွေးဆောင်ရာပါ၍ ဟောပြောလျှင်၊ ငါထာဝရဘုရားသည်၊ ထိုပရောဖက်ကိုသွေးဆောင်သည့်အတိုင်း၊ ဆန့်တန်းသောလက်ရုံးတော်ဖြင့်၊ ဣသရေလ လူမျိုးတော့်ဘောင်မှ သုတ်သင်လျက်၊ 10 ပရောဖက်ဒုစရိုက်ဝန်နှင့်၊ မေးလျှောက်သူ၏ ဒုစရိုက်ဝန်မခြားနားဘဲ၊ နှစ်ဦးလုံးပင်ထမ်းဆောင်ရမည်။ 11 သို့မှဣသရေလအမျိုးသားတို့သည်၊ နောင်အထံတော်ကလွှဲခြင်း၊ လွန်ကျူးမှုများဖြင့်မသန့်ရာရောက်ခြင်းကိုမပြုဘဲ၊ ငါ၏လူမျိုးတော်၊ ငါလည်းသူတို့ဘုရားသခင်ဖြစ် လတ္တံ့ဟု၊ အရှင်ထာဝရဘုရားမိန့်တော်မူကြောင်း၊ ဆင့်ဆိုလော့ဟူ၍တည်း။

12 ငါသို့ရောက်ပြန်သော ထာဝရဘုရား၏ ဗျာဒိတ်တော်ကား၊ 13 အချင်းလူ့သား၊ သစ္စာတော်ကိုဖောက်ကျော်၍၊ ငါ့အားပြစ်မှားသောပြည်ပေါ်တွင်၊ ဆန့်တန်းသောလက်ရုံးတော်ဖြင့်၊ အစာအာဟာရအထောက်အခံကို၊ ငါချိုးဖျက်လျက်၊ အစာခေါင်းပါးခြင်းဘေးကို သင့်စေလျက်၊ လူသူတိရစ္ဆာန်ကိုပယ်ရှားရာ၌၊ 14 ငါအရှင်ထာဝရဘုရားမိန့်ဆိုသည့်အတိုင်း၊ နောဧ၊ ဒံယေလ၊ ယောဘ၊ ထိုသူသုံးဦးတို့ပင်နေထိုင်လျက်ရှိသော်လည်း၊ ကိုယ်ဖြောင့်မတ်ခြင်းအားဖြင့်၊ ကိုယ့်အသက်သာ လွတ်ခွင့်ရကြမည်။ 15 ထိုပြည်တွင် သားရဲဘေးကို၊ ငါသင့်စေသည့်အလျောက်၊ သားရဲများကြောင့်၊ ဖြတ်သန်းသူမဲ့ဖုန်းဆိုးကုန်းဖြစ်သည့်တိုင်အောင်၊ ပြည်သားတို့ပျက်စီးရာ၌၊ 16 အသက်တော်ကိုတိုင်တည်၍၊ ငါအရှင်ထာဝရဘုရားမိန့်ဆိုသည့်အတိုင်း၊ ထိုသုံးဦးတို့နေထိုင်လျက်ရှိသော်လည်း၊ သားသမီးများကိုပင်ကယ်လွှတ်ခွင့်မရဘဲ၊ နေပြည်သည် ဖုန်းဆိုးကုန်းနေလျက်၊ ကိုယ်ချည်းသာလွတ်မြောက်ခွင့်ရကြမည်။ 17 ငါသည် ထိုပြည်တွင်၊ ဓားဖြတ်သွားစေဟုအမိန့်ရှိလျက်၊ ဓားဘေးသင့်စေသဖြင့်၊ လူသူတိရစ္ဆာန်ကိုပယ်ရှားရာ၌၊ အသက်တော်ကိုတိုင်တည်၍၊ 18 ငါအရှင်ထာဝရဘုရားမိန့်ဆိုသည့်အတိုင်း၊ ထိုသုံးဦးနေထိုင်လျက်ရှိသော်လည်း၊ သားသမီးများကိုပင်ကယ်လွှတ်ခွင့်မရဘဲ၊ ကိုယ်ချည်းသာလွတ်မြောက်ခွင့်ရကြမည်။ 19 ထိုပြည်မှ၊ လူသူတိရစ္ဆာန်ကိုပယ်ရှားရန်၊ အမျက်တော်ကိုသွန်းလောင်းလျက်၊ ကပ်ရောဂါဘေး၊ သွေးသွန်းဘေး၊ သင့်စေရာ၌၊ 20 အသက်တော်ကိုတိုင်တည်၍၊ ငါအရှင်ထာဝရဘုရားမိန့်ဆိုသည့်အတိုင်း၊ နောဧ၊ ဒံယေလ၊ ယောဘတို့နေထိုင်လျက်ရှိသော်လည်း၊ သားသမီးများကိုပင်ကယ်လွှတ် ခွင့်မရဘဲ၊ ကိုယ့်ဖြောင့်မတ်ခြင်းအားဖြင့်၊ ကိုယ့်အသက်သာလွတ်ခွင့်ရကြမည်။ 21 သို့နှင့်အညီ၊ ငါအရှင်ထာဝရဘုရားမိန့်ဆိုသည့်အတိုင်း၊ လူသူတိရစ္ဆာန်ကိုပယ်ရှားအံ့သောငှာ၊ ဓားဘေး၊ အစာခေါင်းပါးခြင်းဘေး၊ သားရဲဘေး၊ ကပ်ရောဂါဘေးတည်း ဟူသောမဟာဒဏ်လေးချက်ကို၊ ယေရုရှလင်မြို့ပေါ်သို့ ငါသင့်စေသည့်ကာလ၊ မုချခက်ခဲလိမ့်တကား။ 22 သို့ရာတွင်လွတ်မြောက်သောသားသမီးအချို့ကြွင်းကျန်လျှင်၊ သင်တို့ရှိရာသို့ထွက်လာကြသော်၊ အလေ့အလာအပြုအကျင့်များကို သိမြင်သောသင်တို့သည်၊ ယေရုရှလင်မြို့ပေါ်သို့ ငါသင့်စေသမျှသောဘေးဒုက္ခကိုထောက်၍၊ နှစ်သိမ့်ခွင့်ရကြလိမ့်မည်။ 23 ထိုအလေ့အလာအပြုအကျင့်များကို သိမြင်ကြသည့်ကာလ၊ စီရင်သမျှကို၊ အကြောင်းမဲ့ငါမစီရင်ကြောင်းနားလည်သည့်အတိုင်း၊ နှစ်သိမ့်ခွင့်ရကြလတ္တံ့ဟု၊ ငါအရှင် ထာဝရဘုရားမိန့်ဆိုသည်ဟူ၍တည်း။